«ԿՀԱՆԴԻՊԵՆՔ ԲԱՐԻԿԱԴՆԵՐՈՒՄ» Կուսակցական ակտիվին խոստացավ Արամ Կարապետյանը Վեցամսյա լռությունից հետո երեկ Կինոյի տանը «Նոր ժամանակներ» կուսակցության ղեկավար Արամ Կարապետյանը ժողովել էր կուսակցության ակտիվին: Հավաքին ներկա էր նաեւ Աշոտ Մանուչարյանը, որն իր ելույթում համաձայնություն հայտնեց Արամ Կարապետյանի առաջարկած սկզբունքներին: Իսկ պարոն Կարապետյանը, ինչպես արդեն տեղեկացրել ենք, առաջարկում է հեղափոխություն՝ ներքեւից: «Եթե մենք ներքեւից ճնշում չգործադրենք, ոչինչ էլ երկրում չի փոխվի: Եվ եթե այդ ճնշումը ներքին ռեսուրսի վրա հիմնված չլինի, արտաքին ազդեցությունների միջամտությունը շատ վատ է ազդելու»,- ասաց պարոն Կարապետյանը: Երկրում ստեղծված «դեզօրգանիզացիային» վերջ դնելու համար բանախոսը Ռոբերտ Քոչարյանին մեկ անգամ եւս սթափության կոչ արեց, այլապես՝ «կհանդիպենք բարիկադներում»,- խոստացավ պարոն Կարապետյանը: Ի դեպ, բարիկադները, ըստ նրա, սարի ետեւում չեն, այլ՝ 2005-ի շեմին, հղումներ կատարելով ՌԴ-ի փորձին, հավաստում է ՆԺ ղեկավարը: Վերլուծելով անցած քաղաքական իրավիճակը՝ Ա. Կարապետյանը ընդդիմությանը չի մեղադրում՝ «Արեցին այն՝ ինչ կարող էին: Բայց մեր խնդիրը լինելու է՝ պատրաստ լինել բոլոր քայլերին: Հարց չպիտի ծագի՝ անցնե՞լ փշալարը, թե՞ ոչ: Եթե հասել ենք փշալարին, պիտի անցնենք»: Սա, իհարկե, բանախոսը լավագույն ճանապարհը չի համարում, բայց գտնում է, որ եթե մեր երկրում իշխանափոխությունը ձգվեց մինչեւ 2008 թվականի ընտրությունները, ապա իշխանությունը վերարտադրվելու է: Առանձին-առանձին քննադատության ենթարկվեցին իշխանության բոլոր ճյուղերը՝ նախագահի գլխավորությամբ: ԱԺ-ի մասով առաջարկվեց. «Թող հավաքվեն ամիսը մեկ անգամ, գոնե իրար հետ խոսելու բան կունենան»: Նաեւ հռետորական հարցեր հնչեցվեցին՝ «Կառավարությունն անհանգստանում է, արդյո՞ք, որ Ադրբեջանի բյուջեն մերի քառապատիկն է, ռազմական հատկացումները՝ կրկնակին, որ որեւէ գործառույթ չունենք, որպեսզի բյուջեն համալրվի»: Արտաքին քաղաքականության մասով էլ հեգնեց. «Աստված մի արասցե, բայց եթե Արցախը դառնա Ադրբեջանի անքակտելի մաս, Օսկանյանը կասի՝ մենք հաղթել ենք: Հայաստանի նախագահը գնում է Վրաստան, ստորագրվելիք պայմանագրով Ջավախքը վերջնականապես պետք է զիջվի Վրաստանին: Մենք այդ հարցը չենք բարձրացրել: Իսկ ի՞նչ է անում ՀՅԴ-ն, որի ծրագրի մեխն է եղել դա. ինչպե՞ս պիտի պաշտպանեն Քոչարյանի արտաքին քաղաքականությունը»: Նախագահի վրաստանյան այցի հետ կապված մի դիտարկում եւս. «Քոչարյանն այնտեղ հարցազրույց է տալիս եւ ասում՝ Վարդերի հեղափոխությունից հետո Վրաստանում ամեն ինչ շտկվեց: Ես հասկանում եմ, որ նախագահը մեզ հորդորում էր, ասում է՝ դուք էլ հեղափոխություն արեք»: Խոսք ուղղվեց նաեւ խորհրդարանական ընդդիմությանը, որն, ի դեպ, ներկա չէր ժողովին. «Եթե դուք համոզված եք, որ խորհրդարանը լավ չի աշխատում, եթե դուք գիտեք, որ նա ապիկար է՝ ինչո՞ւ չեք դնում մանդատները եւ դուրս գալիս: Չէ՞ որ այդպիսով նոր քաղաքական իրավիճակ եւ հնարավորություն կստեղծվի՝ իշխանությունների վրա ճնշում գործադրելու: Հեշտ է լինել մարմնի անդամ եւ քննադատել: Բայց եթե ամեն ինչ վատ է, ինչո՞ւ շարունակել մնալ այդտեղ»: Մի խոսքով՝ «Նոր ժամանակները» ձեռնարկում է իմիտացիաներին վերջ դնելու գործընթաց. «Պիտի ձեւավորվի բանակի նման քաղաքական ուժ»: Իշխանափոխության արդյունքում ակնկալվում է ձեւավորել մասնագետների կառավարություն եւ ԱԺ, շատ հարցեր լուծում կգտնեն նախագահի հրամանագրով՝ «ավանտյուրաները» բացառելու նպատակով: Ի՞նչ չի լինի. «Այդ հեղափոխությունը պիտի չլինի սոցիալական, էթնիկ, դասակարգային»,- պարզաբանեց Ա. Կարապետյանը: Ազնիվ մարդիկ իրենց ուրույն տեղն են ունենալու, վհուկների որս չի նախատեսվում, բայց երբեւէ կատարած անհարկի արարքի համար պատասխան են տալու բոլորը: Երկիրն ընտրելու է արդյունաբերական զարգացման ուղին: Կատարվելու է ֆինանսական ամնիստիա: ՆԵԼԼԻ ԳՐԻԳՈՐՅԱՆ
