Իսպանիայում
եզրագծին մոտեցող շախմատի համաշխարհային 36-րդ օլիմպիադայի 11-րդ տուրում Հայաստանի
հավաքականը երկրորդ տեղում ընթացող Ռուսաստանի թիմին շրջանցելու ռեալ հնարավորությունը
ձեռքից բաց թողեց: Այս օլիմպիադայում համեմատաբար համեստ հանդես եկող շվեյցարացիներին
մեր Վլադիմիր Հակոբյան-Լեւոն Արոնյան-Ռաֆայել Վահանյան-Գաբրիել Սարգսյան քառյակը
հաղթեց նվազագույն՝ 2,5:1,5 հաշվով ու ռուսների հետ կես միավորի տարբերությունը պահպանվեց,
քանի որ նույնպիսի հաշիվ գրանցվեց նաեւ Ռուսաստան-ԱՄՆ մրցապայքարում: Կալվիայում
պարզապես հիացնում է Ռաֆայել Վահանյանը: Մեր վետերանը, եթե նրան կարելի է այդպես
անվանել, կարծես մոռացել է տարիքը: Ավելին, նա հանդես է գալիս երիտասարդական եռանդով
ու ամենեւին էլ պատահական չէ, որ մասնագետների ու վիճակագիրների պնդմամբ այս օլիմպիադան
լավագույնն է Ռաֆայելի կյանքում: Նա իր անվան դիմաց արդեն գրանցել է 7,5 միավոր՝
9 հնարավորից եւ հավակնում է լավագույն մասնակցի կոչմանը: Առայժմ 6-ական միավոր
են վաստակել նաեւ Լեւոն Արոնյանն ու Սմբատ Լպուտյանը: Սակայն Լեւոնը խաղատախտակի
առջեւ նստել է ութ անգամ, իսկ նրա ավագ գործընկերը՝ մեկով ավելի: Ութ հնարավորից
5,5 միավոր ունի երիտասարդ գրոսմայստեր Գաբրիել Սարգսյանը: Հաշվի առնելով նրա տարիքը
եւ այն, որ Գաբրիելն իրեն վստահ է զգում համաշխարհային օլիմպիադայի նման բարձրակարգ
մրցաշարում, նրա այս ցուցանիշն ավելի քան ուրախացնող պիտի համարել: Հայաստանի
ներկայիս լավագույն շախմատիստ Վլադիմիր Հակոբյանի 2,5 միավորն առաջին հայացքից տարօրինակ
կարող է թվալ: Սակայն չմոռանանք, որ նա Կալվիայում պայքարի մեջ ներգրավվել է 7-րդ
տուրից, այն էլ՝ Բրիսսագոյում աշխարհի չեմպիոնության համար կայացած Վլադիմիր Կրամնիկ-Պետեր
Լեկո ծանրագույն մրցամարտում հունգարացու՝ մարզչի ու մարտավկայի պարտականությունները
կատարելուց անմիջապես հետո: Եվ վերջում Արտաշես Մինասյանի մասին: Լինելով
Հայաստանի լավագույն շախմատիստներից մեկը, նա, այնուամենայնիվ, աշխարհի մասշտաբով
եղանակ ստեղծող չէ եւ խաղացած չորս պարտիաներում 1,5 միավոր վաստակելը վատ արդյունք
չէ: Տղամարդկանց մրցաշարում առաջատարը շարունակում է մնալ Ուկրաինան՝ 32 միավոր:
Նրան հաջորդում է Ռուսաստանը՝ 29,5 միավոր, Հայաստանը պահպանում է 3-րդ տեղը՝ 29
միավորով: Երեկ մեր տղաների մրցակիցը ԱՄՆ-ի թիմն էր: Անդրադառնալով
կանանց պայքարին՝ նշենք, որ 11-րդ տուրում մեր աղջիկները 1:2 նվազագույն հաշվով տանուլ
տվեցին Ռուսաստանին, որից հետո 19,5 միավորով նահանջեցին 15-րդ հորիզոնական: Սակայն
նույնքան միավոր ունեն միանգամից վեց թիմեր: Այնպես որ, 12-րդ տուրում սլովակուհիների
հետ երեկ կայացած մրցամարտը կարեւոր նշանակություն ուներ վերջնական արդյունքի համար:
ԱՇՈՏ ՀԱԿՈԲՅԱՆ
