Իշխանամետները
նույնպես կասկածում են, բայց դեմ են զգացմունքայնությանը Կոալիցիոն քաղաքական
ուժերի ներկայացուցիչներին ամենեւին չի հետաքրքրում, թե մեկուսարանում արդյոք ի՞նչ
վիճակում են «Հոկտեմբերի 27»-ի ոճրագործները: Նրանք նաեւ այն կարծիքին են, որ «27»-ի
շուրջ կասկածները դեռեւս չեն փարատվել: Եվ ի տարբերություն ընդդիմության, որն այն
կարծիքին է, թե «27»-ի մասին շատ բան կբացահայտվի իշխանափոխությունից հետո, կոալիցիոն
գործընկերները վստահ են, որ ոչինչ էլ չի բացահայտվի, քանի որ «27»-ի արմատները շատ
ավելի խորն են եւ դրսում: ՀՅԴ խմբակցության ղեկավար Լեւոն Մկրտչյանը, ՀՀԿ խմբակցության
ղեկավար Գալուստ Սահակյանը եւ ՕԵԿ անդամ Մհեր Շահգելդյանը երեկ մեզ ասացին, որ իրենց
չի էլ հետաքրքրում, թե ոճրագործները ի՞նչ վիճակում են: Արդյո՞ք հոկտեմբերի 27-ի շուրջ
կասկածները փարատված են, արդյո՞ք իշխանություն ներկայացնող քաղաքական ուժերի համար
ամեն ինչ միանշանակ պարզ է եւ բոլոր մեղավորներն են պատժված: Լեւոն Մկրտչյանի բնորոշմամբ.
«Հոկտեմբերի 27-ը իր բացասական նշանակությամբ իսկապես մեր պետության ամենածանր հարվածներից
մեկն էր: Եվ եթե հիշում եք, հենց հոկտեմբերի 27-ին հաջորդած առաջին երկու օրերին,
առաջին տպավորությունների տակ ես միտք հայտնեցի, որ հայ իրականության մեջ նման ծրագիր
ի վիճակի չէր որեւէ ուժ կազմակերպել: Ըստ էության, պատժվողները, կոնկրետ հանցագործները
բացահայտված են եւ ստացել են իրենց պատիժը: Բայց հանցագործությունը դեռեւս երեւի
տարիներ հետո էլ կշարունակի հարցականներ պարունակել: Համոզված եմ, որ հայ իրականության
մեջ ծնված իդեա չէր սա, անկախ նրանից՝ հանցագործները դա գիտակցում էին, թե չէին գիտակցում»:
Օրերս մեր թերթին տված հարցազրույցում «27»-ի զոհերից Յուրի Բախշյանի կինը՝ Անահիտ
Բախշյանը, զուգահեռ էր անցկացրել ոճրագործների որոշ հայտարարությունների եւ այսօր
իշխանությունների կողմից վերջին հինգ տարիների տնտեսական աճի մասին հրապարակումների
միջեւ: Տիկին Բախշյանը առանց մեկնաբանությունների որոշ ընդհանրություններ էր տեսել
այս ամենի մեջ: Լեւոն Մկրտչյանը այս զուգահեռին համաձայն չէր. «Չեմ տեսնում այդտեղ
որեւէ կապ, որովհետեւ տնտեսական աճի եւ երկրի կայունության մեջ մեծ դերակատարում
ունի նաեւ Վազգեն Սարգսյանի կառավարությունը, որը շատ կարճ ժամանակ գոյություն ունեցավ,
բայց որոշակիորեն շարունակեց այն գիծը, որը ուղղված էր աստիճանական տնտեսական աճի
կուտակմանը: Այդ գործընթացը սկսվել էր 1998-ից, երբ հանրապետության ներկա նախագահը
ՀՀ վարչապետ էր: Այդ ժամանակ որոշակի արմատական շրջադարձ եղավ երկրի տնտեսական քաղաքականության
մեջ: Արմեն Դարբինյանի օրոք այդ ուղղությունը շարունակվեց, Վազգեն Սարգսյանի ժամանակ
շատ լուրջ տեղաշարժեր ունեցանք: Ըստ էության, տնտեսական աճի հիմքերը 98-ից դրվեցին:
Եվ եթե ներկայումս ունենք հաջողություններ, հնարավոր չէր դրանք ունենալ 2-3 տարվա
ընթացքում»: Հանրապետական խմբակցության ղեկավար Գալուստ Սահակյանը «27»-ի
շուրջ կասկածների մասին մեր հարցին պատասխանելով՝ ասաց, որ իր զգացողությունը ավելի
շատ սուբյեկտիվ է այդ հարցում. «Բնականաբար, ավելի շատ հակված եմ անընդհատ կասկածելու,
որովհետեւ կորուստը անչափ մեծ էր»: ՀՀԿ խմբակցության ղեկավարը ամենեւին չի կիսում
զուգահեռը՝ վերջին հինգ տարիներին տնտեսության գրանցած աճի մասին հայտարարությունների
եւ ոճրագործների հայտարարությունների միջեւ: Այդ զուգահեռները Գալուստ Սահակյանը
գնահատեց զգացմունքային. «Ոճրագործի հայտարարություններին մենք ե՛ւ դատավարության
ժամանակ, ե՛ւ ընդհանրապես հակադարձել ենք: Իսկ այդ զուգահեռը ես գնահատում եմ որպես
շատ զգացմունքային արտահայտություն եւ կարծում եմ՝ այդ զգացմունքայնությունը մեզ
էլ է պատել»: Անահիտ Բախշյանը դարձյալ նույն հարցազրույցում «Միասնություն»
դաշինքի երբեմնի անդամների, այսօր իշխանություն ներկայացնող անդամների հասցեին կարծիք
էր հայտնել՝ ասելով, որ նրանք պատեհապաշտներ են եւ չեն հարգում զոհերի հիշատակը,
որ դավաճանել են այդ հիշատակին: Ըստ էության, դա առաջին հերթին ուղղված էր ՀՀԿ-ին:
«Կորուստն ակնհայտ է եւ անդառնալի, ամեն օր հիշվող, եւ այդ պատճառով հարկավոր է շատ
զգացմունքային ընդունել Անահիտ Բախշյանի խոսքերը: Իսկ ինչ վերաբերում է ընդհանուր
գործառույթներին, գոնե Հանրապետականը մշտապես որոշումներ կայացնելիս խորհում է, թե
այդ ամենի մասին ինչպես կմտածեին մեր նահատակները: Համենայնդեպս, այս հինգ տարիների
ընթացքում փորձել ենք նույն կերպ մտածել, նույն կերպ գործել: Հարց է, թե ով ինչպես
կընդունի դա: Որոշ բաներ հաջողվել են, որոշ բաներ չեն հաջողվել, բայց կարծում եմ,
որ 99-ին թողնված գաղափարախոսությամբ եւ նույն ճանապարհով էլ գնում ենք առաջ: Իսկ
զգացմունքային խոսակցությունները բնական եմ համարում, երբեմն-երբեմն մենք էլ ենք
անզուսպ լինում նման հարցերում, որովհետեւ կորուստը մեզ համար շատ մեծ է»: ՕԵԿ
խմբակցության անդամ, ԱԺ պաշտպանության, ՆԳ եւ ԱԱ հարցերի մշտական հանձնաժողովի նախագահ
Մհեր Շահգելդյանի բնորոշմամբ՝ «Այդ ոճրագործությունը մեծագույն հարված էր Հայաստանի
Հանրապետությանը: 27-ի գործի քննության հետ կապված բոլոր հարցերը հիմնականում պարզ
են, բայց մեկ այլ խնդիր ունենք այսօր լուծելու՝ հասկանալ, թե մեր հասարակության մեջ
նման երեւույթը ինչպե՞ս հնարավոր դարձավ»: ՄԱՐԳԱՐԻՏ ԵՍԱՅԱՆ
