ՕՐԵՆՍԴՐԱԿԱՆ ՃԳՆԱԺԱՄ Երեկ դեռ առավոտից էր հայտնի, որ ԱԺ մեծամասնությունը մտադիր է մեկ օրում սպառել օրակարգը, որպեսզի հոկտեմբերի 26-27-ին չլինեն նիստեր: Եվ երբ այս կանխատեսումն իրականացավ՝ մեկնաբանությունների համար դիմեցինք ԱԺ նախագահ Արթուր Բաղդասարյանին: – Այսօր ԱԺ-ն մեկ օրում անդրադարձավ 25 օրինագծի, որոնց առնչությամբ ելույթ էին ունենում միայն զեկուցողն ու հարակից զեկուցողը: Մեկ բացառությամբ՝ երբ ելույթ ունեցաք Դուք, չեղան ո՛չ ելույթներ, ո՛չ հարցեր: – Այս անգամ օրակարգում հիմնականում ներառված էին միջազգային պայմանագրերի եւ 2-րդ ու 3-րդ ընթերցման հարցեր: Իսկ միջազգային պայմանագրերի քննարկումն անցած 10 տարիներին էլ է միշտ տեւել 3-5 րոպե: Ընդհանրապես՝ օրակարգում հիմնականում մնացել են 2-րդ եւ 3-րդ ընթերցման օրինագծեր, որոնց համար նախատեսված մեկամսյա ժամկետը դեռ չի լրացել: Նոյեմբերի 8-10-ի եռօրյայում կունենանք շատ հարցեր, երբ կլրանա այդ ժամկետը: – Դուք ավարտված ազդարարեցիք նիստերը՝ հայտարարելով, թե սպառվել է եռօրյայի օրակարգը: Սակայն ինչպե՞ս եք սպառել, երբ եռօրյա նիստերի օրակարգում է ընդդիմադիրների բացակայության հարցը: – ԱԺ կանոնակարգի համաձայն՝ ԱԺ նախագահն է որոշում քննարկվող հարցերի հերթականությունը: Այո՛, բացակայությունների հարցը ներառված է եռօրյա նիստերի օրակարգում, բայց կանոնակարգի 45 եւ 18 հոդվածների համաձայն՝ ԱԺ նախագահն է որոշում, թե հարցը երբ կարող է դնել քննարկման: Մենք ունեցել ենք բազմաթիվ օրենսդրական նախաձեռնություններ՝ ընդ որում, ես եմ եղել հեղինակը, որ երեք տարի ներառված են եղել եռօրյա նիստերի օրակարգում եւ չեն քննարկվել: Կարող եմ նշել բազմաթիվ օրինակներ: (ԱԺ պետաիրավական հարցերի հանձնաժողովի նախագահ Ռաֆիկ Պետրոսյանը երեկ լրագրողների հետ զրույցում անդրադառնալով այն փաստին, որ ընդդիմադիր պատգամավորները գրավոր չեն զգուշացվել, թե քննարկվելու է իրենց հարցը, ասաց. «Երբ ընդդիմությունը գրավոր կստանա՝ նոր միայն պիտի սկսենք հաշվարկել այդ երկու անգամ զգուշացման ժամկետը».- Ա. Ի.): Հարցը ոչ միայն իրավական կողմ ունի, այլ նաեւ քաղաքական: Ես չեմ գտնում, թե այսօր պետք է մեր պատգամավորներին զրկենք մանդատներից: Եվ ոչ էլ գտնում եմ, թե կանոնակարգն ունի նման իմպերատիվ պահանջ: – Արդյոք եռօրյան մեկ օրում ավարտելու նպատակն այն չէ՞ր, որ ձախողեք հոկտեմբերի 27-ի նախօրեին ընդդիմության՝ հայտարարություններով հանդես գալու հնարավորությունը: – Իհարկե, ո՛չ: (ՀՀԿ խմբակցության ղեկավար Գալուստ Սահակյանը մեր նույն հարցին պատասխանեց. «Կարծում եմ՝ մինչեւ հիմա եղած հայտարարությունները ոչնչի չեն վնասել կամ օգնել».- Ա. Ի.): Նախորդ եռօրյան էլ շուտ ավարտվեց, երկու եռօրյա առաջ էլ նիստերը շուտ ավարտվեցին: Մենք նույնիսկ 20-ից ավելի միջազգային պայմանագրեր արագացված ռեժիմով ներառեցինք այս օրակարգում, որ քննարկման հարցեր լինեն: Ընդհանուր առմամբ՝ երկրում արդեն ձեւավորված է օրենսդրությունը: Եվ օրակարգի առնչությամբ իրոք խնդիր ունենք, դրա համար էլ ԱԺ կանոնակարգում նախատեսում ենք փոփոխություններ, որոնք արդեն ստորագրել եմ ու դրվել են շրջանառության մեջ: – Ըստ այդմ՝ եռօրյա նիստերը գումարվելու են երեք շաբաթը մե՞կ: – Կա ե՛ւ նման առաջարկ, ե՛ւ 4 շաբաթը մեկ նիստեր անելու առաջարկ: Կա առաջարկ, որ 2-րդ ընթերցումը լինի առաջինի ռեժիմով: Թե չէ լինում են օրենքների նախագծերի փաթեթներ, որոնք բաղկացած են 60 էջից, բայց զեկուցումը տեւում է մեկ րոպե: 3-րդ ընթերցումն էլ լինելու է 2-րդի ռեժիմով: Բացի այդ՝ նախատեսվում է, որ մշտական հանձնաժողովները նստաշրջանը երկու անգամ պետք է կազմակերպեն լսումներ՝ կարեւորագույն օրինագծերի շուրջ: – Շրջանառության մեջ է դրվել նաեւ օրենքի նախագիծ «ԱԺ պատգամավորի պահվածքի մասին», որում նշված է, թե պատգամավորն ԱԺ նիստերում քվեարկում է անձամբ եւ միայն իր փոխարեն: Սակայն այսօր ներկա 60 պատգամավորները քվեարկում էին 80 հոգու փոխարեն: ԱԺ պետաիրավական հարցերի հանձնաժողովի նախագահ Ռաֆիկ Պետրոսյանը քվեարկում էր երկուսի, իսկ Հարություն Ղարագյոզյանը՝ 5 հոգու փոխարեն: Կան համապատասխան լուսանկարներ: – Լավ կլիներ՝ հրապարակվեն այդ լուսանկարները, որ մարդիկ մյուս անգամ չքվեարկեն մյուսների փոխարեն: – Ընդամե՞նը: Բայց եթե լրագրողները տեսնում էին այս ամենը՝ մի՞թե չէին տեսնում նիստը վարողները, որ չեղավ որեւէ դիտողություն: – Եթե առարկություն կա քվեարկության արդյունքների վերաբերյալ՝ ԱԺ նիստը վարողը քննարկման է դնում այն: – Ո՞վ պիտի առարկի: Երբ ընդդիմությունը եւ մասնավորապես՝ Արշակ Սադոյանը նիստերի դահլիճում էին, հետեւում էին, որ չխախտվի օրենքը: – Ընդդիմության բացակայությունն իրոք ազդում է: Եվ ընդդիմությունը պիտի գա ԱԺ նիստերի դահլիճ ու մտահոգ լինի, որ երկրում ընդունվեն իրոք որակյալ օրենքներ: Ընդդիմության մասնակցությունն ԱԺ օրինաստեղծ գործընթացին բարձրացնում է օրենքների որակը: Բայց չեն գալիս ոչ միայն նրանք, այլ նաեւ ԱԺ շատ պատգամավորներ, որ ընդհանրապես ժամանակ չունեն նիստերին հաճախելու համար: Ես համաձայն եմ, որ այս ԱԺ-ի իրոք շատ քիչ պատգամավորներ են զբաղվում օրինաստեղծ գործունեությամբ: Հարցազրույցը վարեց ԱՆՆԱ ԻՍՐԱՅԵԼՅԱՆԸ
