Այս տարվա սեպտեմբերի 21-ին ՀՀ
պաշտպանության նախարարության Վ. Սարգսյանի անվան ռազմական ակադեմիայում սպանվեց գյումրեցի
Գեւորգ Կարապետի Խնկոյանը: Նա ավարտել էր Գյումրիի «Ֆոտո» վարժարանը, ռազմական
ինստիտուտ էր ընդունվել 2002-ի օգոստոսի 3-ին, երրորդ կուրսանտական գումարտակի կուրսանտ
էր: Ըստ 3-րդ վաշտի հրամանատար, լեյտենանտ Ա. Գեւորգյանի տված բնութագրի, «ուսման
մեջ ունեցել է լավ առաջադիմություն, բնավորությամբ հանգիստ էր ու կարգապահ»: Գ. Խնկոյանն
արժանացել էր 22 խրախուսանքի եւ «ֆիզիկապես առողջ էր, բարոյապես կայուն»: Սպանությունը
կատարվել է հրազենով, գլխին առկա էր հրազենի հետք: Քննությունը վարում է զինդատախազության
քննիչ Սարգիս Սարգսյանը: «Առավոտի» տեղեկություններով, ձերբակալված են Բաբկեն Երոյանը,
Վլադիմիր Հովհաննիսյանը: Տուժողի իրավահաջորդ է ճանաչվել մայրը՝ Ասանեթ Խնկոյանը:
Ըստ նրա էլ, զինդատախազության աշխատակիցները որդու ակնհայտ սպանությունը փորձում
են վերաորակել որպես ինքնասպանություն: Դեպքի վայրում հայտնաբերվել էր Գեւորգի երկտողը.
«Ողջույն, սիրելիս, ինչպե՞ս ես: Սիրելի Հեղինե, շնորհավորում եմ քո ծննդյան օրը:
Ցանկանում առողջություն, հաջողություն, սեր: Հեղինե ջան, կներես, որ ամեն ինչ այսպես
է ստացվում: Տանը շատերն են ուզում, որ մենք իրար հետ չլինենք եւ ամեն կերպ սպառնում
էին, բայց չստացվեց: Քեզ հետ որ լինում եմ, չեմ կարող ոչ մի բան խոսել, չգիտեմ, թե
ինչից է»: Այս գրությունն էլ դարձել էր, ըստ գործի նյութերի, այն շարժառիթը, թե իբր
զինվորը անձնական հողի վրա, սիրած աղջկան գրելուց հետո է որոշել կատարել ինքնասպանությունը:
Զինվորի մայրը ուշադրություն հրավիրեց այն հանգամանքին, որ դեպքի օրը որդին հերթապահություն
է կատարել պահակակետում, ինքնաձիգով: Նա պետք է հերթապահությունն ավարտեր գիշերվա
ժ. 4.30-ին, իսկ դեպքը կատարվել է ժ. 4.40-ին: Դեռեւս ընթացող նախաքննությունը չի
պատասխանել այն հարցին, թե ինչու զինվորը չի հանձնել պոստը: Ընդ որում, ավտոմատը,
որով կատարվել է սպանությունը, Գ. Խնկոյանինը չի եղել: Նա նաեւ տեղեկացրեց, որ տասն
օր առաջ որդին եղել է արձակուրդում եւ որեւէ դժգոհություն, մտահոգություն չի հայտնել,
միայն երկու ականջների ետեւում տեսել է հետքեր ու իր հարցին, թե դրանք ի՞նչ են, պատասխանել
է, որ վիճել է իր ընկերների հետ: «Որդիս պատմեց, որ ինքը եւ իր ընկերը դաժանորեն
ծեծվել են մոտ 8 համածառայողների կողմից, սակայն վկաներից կեղծ ցուցմունքներ կորզելով՝
ծեծողների թիվը հասցվել է երկուսի»,- ասաց տուժողի իրավահաջորդը: Երեկ նա
դիմել է ՀՀ նախագահ Ռ. Քոչարյանին եւ գլխավոր դատախազ Աղվան Հովսեփյանին, որպեսզի
քրգործը վերցվի զինվորական դատախազության վարույթից, քանի որ վերջինիս չի վստահում:
Ա. Խնկոյանը նաեւ ասաց, որ բնակվելով Գյումրիում, ինքը հնարավորություն չունի պարբերաբար
գալ Երեւան՝ զբաղվելու որդու գործով. «Չունեմ ֆինանսական միջոցներ՝ փաստաբան վարձելու
համար եւ պահանջում եմ օրինական կարգով ինձ տրամադրել նման միջոցներ»: ՌՈՒԶԱՆ
ՄԻՆԱՍՅԱՆ
