Հայրենակիցներ Քաղաքակիրթ աշխարհի համար այսօր առաջնահերթ
խնդիր է ահաբեկչության դեմ համընդհանուր պայքարը: Բռնարարքների միջոցով ահաբեկիչները
ձգտում են ազդել քաղաքական գործընթացների վրա` այս կամ այն երկրին, միջազգային կառույցին
քաղաքական լուծումներ պարտադրելով: Եվ եթե նրանք հաջողություն արձանագրեն, ապա կդառնան
ավելի վստահ, դաժան ու լկտի եւ մեծ վտանգ կներկայացնեն ցանկացած երկրի հասարակության
համար, լրջագույն հարված հասցնելով ժողովրդավարությանը: Հինգ տարի առաջ մեր
երկրում նախադեպը չունեցող ահաբեկչությունը ցնցեց բոլորիս: Կատարվածի հասարակական
վտանգավորության աստիճանն աննկարագրելի մեծ էր: Իսկ համարժե՞ք է, արդյոք, մեր վերաբերմունքը:
Ոչ: Քանի որ. – հոկտեմբերի 27-ի կազմակերպիչները հույս ունեն, թե որոշ
ժամանակ անց ժողովուրդը կմոռանա կատարվածի մասին, – ցավոք, մենք այդ ահաբեկչության
գնահատականը տալիս ենք սոսկ հասցված ?ֆիզիկական կորստի ցավի չափով, որը ժամանակի
հետ մեղմանում է, մինչդեռ կատարվածի քաղաքական ու բարոյական վնասը հինգ տարվա ընթացքում
ավելի է մեծացել, – մենք ոչ միայն շեղվել ենք քաղաքացիական հասարակարգ կառուցելու
ճանապարհից, այլեւ հետընթաց ենք արձանագրել նույնիսկ նորանկախ Հայաստանի պատմության
ընթացքում ձեռք բերված փխրուն ժողովրդավարությունից, – մենք չենք դրսեւորում
քաղաքացիական հասարակությանը հատուկ համախմբվածություն եւ միասնականություն, երբ
ժողովրդավարական արժեքներին վտանգ է սպառնում: Բեսլանի ողբերգության առիթով
աշխարհի շատ երկրներում մարդիկ իրենց զորակցությունը հայտնեցին զոհերի հարազատներին
ու միանշանակ ոչ ասացին ահաբեկչությանը: Բայց ամենատպավորիչը հավերժ քաղաք Հռոմում
ավելի քան հարյուր հիսուն հազարանոց ակցիան էր, որի մասնակիցներից շատերը գուցե չգիտեին
անգամ Բեսլանը որտեղ է գտվում: Մարդիկ դուրս էին եկել փողոց` ոչ ասելու ահաբեկչության
միջոցով քաղաքական հարցեր լուծելուն: Իսկ ինչպե՞ս կարձագանքեն Հռոմից 29 տարով
հին եւ Երեւան դարձած Էրեբունու մեր քաղաքացիները մի քանի օր հետո անցկացվելիք հակաահաբեկչական
ակցիային: Եթե պարզվի, որ մեր հասարակությունը հիմնականում անտարբեր է դարձել եւ
հաշտվել ստեղծված վիճակին, ապա դա նշանակում է, որ մենք պարարտ հող ենք ստեղծել նոր,
ավելի լկտի ու ավելի կազմակերպված ահաբեկչության համար: Այդ դեպքում կարող ենք փաստել,
որ ահաբեկիչները հասան իրենց նպատակին: Կոչ ենք անում բոլոր նրանց, ում համար
թանկ է Հայաստանի ապագան եւ մեր երկրում ժողովրդավարական համամարդկային արժեքների
արմատավորումը, մասնակցել հոկտեմբերի 26-ին կայանալիք հանրահավաքին եւ վճռական ո՛չ
ասել ահաբեկչությանը: ՀՈՎՀԱՆՆԵՍ ՀՈՎՀԱՆՆԻՍՅԱՆ Հայաստանի
ազատական առաջադիմական կուսակցության նախագահ
