Ծաղկաձորի անտառը «նվիրել» են բոլորից գաղտնի Կառավարությունն այս որոշումով խախտել է բազմաթիվ իրավական ակտեր ՀՀ նախագահի 1997թ. հրամանագրով եւ Օրհուսի կոնվենցիայով պարտադրվում է, որ պետական իրավական ակտերն ընդունվելուց առաջ անցնեն համաձայնության փուլ՝ շահագրգիռ պետական մարմինների եւ հասարակական կազմակերպությունների մասնակցությամբ: Ծաղկաձորի անտառները բնապահպանության նախարարության ենթակայությունից Ծաղկաձորի քաղաքապետարանին հանձնելու մասին որոշման նախագծի հեղինակը կառավարությունն է: Որոշումն ընդունվել է մեկուկես տարի առաջ: Սա միակ տեղեկությունն է, որ հայթայթեցինք բնապահպանական պետական կառույցում, որոշման օրինակ չունեին: Փորձեցինք պարզել, թե ինչպես է ընթացել նախագծի համաձայնեցման փուլը, ովքեր են մասնակցել քննարկմանն ու ինչպիսի կարծիքներ են հնչել: Պարզվեց, նախագծից անտեղյակ են եղել թե՛ շահագրգիռ պետական կառավարման մարմինը, տվյալ դեպքում՝ բնապահպանության նախարարությունը, թե՛ բնապահպանական հասարակական կազմակերպությունները: «Ես այդ մասին իմացել եմ թերթերից»,- տեղեկացրեց «Շրջակա միջավայրի իրավական պաշտպանություն» ՀԿ նախագահ Աիդա Իսկոյանը: Նախագծից էլ, որոշումից էլ անտեղյակ են եղել «Հանուն մարդկային կայուն զարգացման» ասոցիացիայի նախագահ Կարինե Դանիելյանը, «Տապան էկո ակումբի» նախագահ Հրանտ Սարգսյանն եւ բնապահպանական հասարակական շարժման այլ ակտիվիստներ: Այն, որ կառավարությունը ժամանակ առ ժամանակ խախտում է Օրհուսի կոնվենցիան եւ որոշումներ ընդունում առանց ՀԿ-ների կարծիքի, նորություն չէ: Կարելի է ասել, որ դա օրինաչափություն է հատկապես կանաչ տարածքներն այս կամ այն կազմակերպության տնօրինությանը հանձնելու որոշումներ կայացնելիս: Ինչ վերաբերում է նախագահի հրամանագրին՝ իրավական ակտերի նախագծերը համաձայնեցնել շահագրգիռ պետական կառավարման մարմնի հետ, ապա բնապահպանության նախարարության նորմատիվամեթոդական վարչության պետ Ջուլիետա Ղլիչյանի ներկայացմամբ, «նախագծերի 99%-ը համաձայնեցվում է, բայց այս մեկից տեղյակ չենք եղել, եւ հեղինակն էլ մենք չենք, եթե մենք լինեինք՝ հասարակական լսումները չէինք շրջանցի»: Կառավարության այս որոշումը չի բխում գործող Անտառային օրենսգրքից, որտեղ անտառը համայնքի խնամքին հանձնելու մասին դրույթ չկա: Որոշումն «առաջ է ընկել» Հայաստանի անտառների զարգացման հայեցակարգից՝ այն դեռ չի ընդունվել: Այնինչ, միայն այս հայեցակարգով է նախատեսված անտառային ֆոնդի որոշ հատվածներ համայնքների հաշվեկշիռ փոխանցելու կանոնակարգը: ՌՈՒԶԱՆ ԱՐՇԱԿՅԱՆ
