ԿՈՌՈՒՊՑԻԱՅԻ
ԴԵՄ ՊԱՅՔԱՐՈՂՆԵՐ՝ ՈՒՇԱԴՐՈՒԹՅՈ՛ՒՆ Գորվետկա-4 հասցեում գտնվող
«Պարեն» արտադրական միավորումն ուղղակի վաճառքի ձեւով կառավարությունը սեփականաշնորհեց
Ալիկ Խաչատրյանին, որի մասին հայտնի է, թե տարածքային կառավարման նախարար Հովիկ Աբրահամյանի
փեսան է: Երկրի ղեկավարությանը Ալիկ Խաչատրյանի մասին մատուցվեց կեղծ տեղեկատվություն,
թե նա այս միավորման տնօրե՜նն է, պատրաստվում է ներդրումնե՜ր անել եւ այլն: Փաստ
է, որ նա բացարձակապե՛ս կապ չունի կոլեկտիվի հետ: Իսկ ներդրումների անհավանական լինելու
մասին վկայում են որոշ տեղեկություններ Ալիկ Խաչատրյանի ֆինանսական անբարեհույս վիճակի
մասին: Դրանք բերում են համոզման, որ նա «Պարենը» գնում է զուտ վերավաճառքի նպատակով:
Մինչդեռ ձեռնարկությունը սեփականաշնորհելու ցանկություն ունի նաեւ աշխատանքային
կոլեկտիվը. այդ մասին «Առավոտին» հայտնել է խմբագրություն այցելած «Պարենի» արհկոմի
նախագահը: Ավելին՝ կային եւս 4 հնարավոր հայտատուներ, որոնք շահագրգիռ էին սեփականաշնորհել
այս ձեռնարկությունը: Ընդ որում՝ եթե Ալիկ Խաչատրյանը «Պարենի» համար վճարել էր ընդամենը
42 մլն դրամ, հայտատուներից մեկը պատրաստակամություն էր հայտնել վճարել 75 մլն՝ խոստանալով
նաեւ իրական խոշոր ներդրումներ: Բացառված չէ, որ եթե «Պարենը» սեփականաշնորհվեր հավասար
պայմաններով անցկացվող եւ հրապարակային մրցույթի միջոցով՝ արժեքը հասներ 100 մլն
դրամի: Սակայն պետության համար առավել ձեռնտու այս տարբերակը Պետական գույքի կառավարման
վարչությունը տորպեդահարեց՝ թերեւս կատարելով Ալիկ Խաչատրյանի ազդեցիկ բարեկամի հրահանգը:
Օրենքի բազմաթիվ խախտումներով իրականացված այս գործարքին մենք դեռ կանդրադառնանք,
սակայն առավել կարեւոր է, որ դրանով զբաղվեն կոռուպցիայի դեմ պայքարող մարմինները:
Սեփ. լր.
