ԱՐԳԵԼԵԼԸ
ԵԼՔ ՉԷ Թերեւս քիչ են աշխարհում պետությունները, որոնց երկրորդ
դեմքը խորհրդարանական ամբիոնից կանի նման հայտարարություն, ինչն արեց Հայաստանի վարչապետ
Անդրանիկ Մարգարյանը, թե ինքն անձամբ փորձել է հետաձգել կրոնական մի կազմակերպության
գրանցումը, սակայն այժմ՝ գրանցելուց հետո, աշխատելու են ստեղծել այնպիսի պայմաններ,
որ օրենքի միջոցով արգելվի դրա գործունեությունը: Երեկ ճեպազրույցներում խորհրդարանական
ուժերին խնդրում էինք կանխատեսել, թե ինչպես կվերաբերվի այս հայտարարությանը Եվրախորհուրդը:
Ի պատասխան՝ ՀՀԿ խմբակցության ղեկավար Գալուստ Սահակյանը հայտարարեց, թե իր համար
շատ սարսափելի էր «Եհովայի վկաների» գրանցումը եւ անհրաժեշտ համարեց «գաղափարական
պայքար տանել ոչ միայն «Եհովայի վկաների», այլեւ բոլո՛ր աղանդների դեմ»: ՀՅԴ խմբակցության
ղեկավար Լեւոն Մկրտչյանը, սակայն, նշեց, թե որեւէ բանի դեմ խաչակրաց արշավանքով հնարավոր
չէ արդյունքի հասնել. «Ոչ թե պետք է եվրոպական արժեքները ոտնահարելով պայքարենք աղանդների
դեմ, այլ մենք պարզապես պետք է ուժեղացնենք մեր ազգային արժեքներն ու եկեղեցին»:
ՀՀԿ-ի դիրքորոշմանն անակնկալ եւ ակամա աջակցություն ցուցաբերեց «Ազգային միաբանության»
փոխնախագահ Կորյուն Առաքելյանը, որը հայտարարեց. «Խնդիրը բոլորովին Եվրախորհրդին
սիրաշահելը կամ նրա քննադատությանն արժանանալը չէ»: Նկատենք՝ նման պնդում արեց ներկայացուցիչը
մի կուսակցության, որի ղեկավարը ԵԽԽՎ-ում հայաստանյան պատվիրակության անդամ է, եւ
հրաշալի տեղյակ է այս կառույցի պայմանին՝ հարգել խղճի եւ հավատի ազատությունը: Սա
նաեւ մեր Սահմանադրության պահանջն է, բայց այդ մասին երեկ հիշեցին հազիվ 1-2 պատգամավոր:
Մեկը ԱԺ պետաիրավական հարցերի հանձնաժողովի նախագահ Ռաֆիկ Պետրոսյանն էր, որը նշեց.
«Մինչեւ 2001-ին Եվրախորհրդին մեր անդամակցելը՝ 1995-ին Սահմանադրության մեջ առանձին
հոդվածով արդեն իսկ սահմանել էինք խղճի, դավանանքի ազատություն, նաեւ կրոնական կազմակերպությունների
գաղափարախոսության ու կրոնական կազմակերպությունների մեջ միավորվելու ազատություն»:
Մյուսը «Արդարության» քարտուղար Վիկտոր Դալլաքյանն էր, որը նաեւ նկատեց. «Որեւէ բան
արգելելով՝ դուք որեւէ խնդիր չեք լուծում»: Ա. Ի.
