Անցած
շաբաթ Վազգեն Սարգսյանի անվան ռազմական ինստիտուտի կուրսանտ, փշատավանցի 20-ամյա
Զարզանդ Մխիթարյանի սահմանած արտասովոր ռեկորդին՝ 2 ժամ 51 րոպեում 1150 ձգում-շրջադարձ,
ներկա էր նաեւ ՀՀ պաշտպանության փոխնախարար Արթուր Աղաբեկյանը: Դա ֆիզիկական
արտասովոր դիմացկունություն էր պահանջում, որն էլ կուրսանտը դրսեւորեց հիանալիորեն
ու հիմա հավակնում է գրանցվել Գինեսի ռեկորդների գրքում: Սակայն հայտնի է, որ Հայաստանում
զինակոչային տարիքի երիտասարդները, մեղմ ասած, ֆիզիկապես պատրաստ չեն լիարժեք կատարել
իրենց ծառայությունը: Հենց այս խնդրի շուրջ զրուցեցինք փոխնախարարի հետ: –
Պարոն փոխնախարար, այսօր Զարզանդը ֆիզիկական հազվագյուտ պատրաստվածություն ցուցադրեց:
Ու դա, անկասկած, ուրախացնում է ձեզ՝ զինվորական բարձրաստիճան պաշտոնյայիդ: Իսկ ընդհանրապես
զինակոչային տարիքի երիտասարդների ֆիզպատրաստվածության աստիճանին ի՞նչ գնահատական
կտաք: – Շատ վատ: – Ի՞նչն է պատճառը: – Դպրոցներում համապատասխան
աշխատանք չեն տանում: Հետո երիտասարդներն ընտրում են այնպիսի մարզաձեւեր, որոնք հային
այնքան էլ հոգեհարազատ չեն: Նկատի ունեմ արեւելյան մարզաձեւերը, որոնք բանակում ծառայության
ժամանակ զինվորին այնքան էլ պետք չեն գալիս: – Ասացիք, որ դպրոցներում համապատասխան
աշխատանքներ չեն կատարվում: Հավանաբար խոսքը ֆիզկուլտուրա առարկայի դասավանդման խայտառակ
վիճակի մասին է: Պաշտպանության նախարարությունը կառավարության միջոցով կրթության
նախարարության վրա այդ հարցի լուծման համար ազդելու քայլեր չի՞ ձեռնարկում: –
Մենք սպորտպետկոմի հետ միասին այդ ուղղությամբ աշխատել ենք: Եթե չեմ սխալվում՝ կա
կառավարության որոշում ֆիզկուլտուրան դպրոցում ավարտական քննական առարկա դարձնելու
մասին: Սա, անկասկած, իր դրական դերը կատարելու է: – Իմ կարծիքով դա հեռանկարային
ծրագիր է ու հիմա դպրոցում քննությունները ավելի շատ ձեւական բնույթ են կրելու: 10-րդ
դասարանցին ինչպե՞ս է քննություն հանձնելու, եթե սովորելու ամբողջ ընթացքում ֆիզկուլտուրայի
դաս չի արել: – Հիմա մենք այդ բացը լրացնում ենք բանակում՝ հետեւյալ կերպ:
Բանակը յուրօրինակ դպրոց է: Այն ունի մեկ տարվա հատուկ ծրագիր՝ մարտական պատրաստության
պլան: Ու դրանում սպորտին կարեւոր դեր է հատկացվում: Զինվորը մարզվելիս կատարում,
յուրացնում է այնպիսի մարզական տարրեր, ասենք՝ վազք 100, 300, 3000 մետր, կոլեկտիվ
կազմով վազքեր 5000 մետր, ձգումներ պտտաձողի վրա եւ այլն, որոնք նրան վաղը պետք են
գալու մարտի դաշտում: Եվ հավաստիացնում եմ ձեզ, որ արդեն վեց ամիս անց տարբերությունը
զգացվում է: Ֆիզկուլտուրան, սպորտը մեր մարտական պատրաստության ծրագրում հիմնական
առարկա է ու եթե ստուգվող ստորաբաժան թեկուզ մեկ վաշտը ֆիզպատրաստությունից անբավարար
է ստանում, դա տարածվում է ամբողջ գումարտակի վրա իր բոլոր հետեւանքներով՝ խրախուսանքներ,
արձակուրդ եւ այլն: – Բայց միեւնույն է, դպրոցներում անհրաժեշտ է լուրջ վերաբերվել
ֆիզկուլտուրա առարկային: Դրանով ձեր գործն էլ կթեթեւանա: – Անշուշտ: Եթե կրթության
նախարարությունը դեմքով շրջվի դեպի այդ առարկան եւ ռազմագիտությունը՝ դրանք դիտելով
պետության համար ռազմավարական կարեւոր նշանակություն ունեցող ոլորտներ, բանակում
դրական արդյունքները կստանանք արդեն տվյալ ուսումնական տարվա վերջում: Ֆիզկուլտուրան
այն առարկան չէ, որ առաջին դասարանում բաց թողնելու դեպքում հետագայում լրացվի: Դա
երիտասարդ մարդու եւ ապագա քաղաքացու առողջությունն է, որ չունենալու կամ կորցնելու
դեպքում հետ չի բերվում: ԱՇՈՏ ՀԱԿՈԲՅԱՆ
