ՄՏԱԾԵՔ ԵՐԿՐԻ՛ ՀԵՂԻՆԱԿՈՒԹՅԱՆ ՄԱՍԻՆ ԵԽԽՎ-ում մեր պատվիրակության ղեկավար Տիգրան Թորոսյանն իր ասուլիսում տպավորություն էր հայտնել, թե Դիտարկման հանձնաժողովի համար տարօրինակ էր Շավարշ Քոչարյանի՝ ամեն ինչ ժխտելու մոտեցումը, քանի որ նա պնդում էր, թե ՀՀ-ում բանաձեւերի կատարման որեւէ առաջընթաց չկա: «Անգամ այն մարդիկ, ովքեր նախորդ հանձնաժողովի նիստում կամ վեհաժողովի նախորդ նստաշրջանի ժամանակ բավական աջակցություն էին ցուցաբերել մեր ընդդիմությանը՝ լռում էին: Եվ սա նույնպես որոշակի նշան է,- ասել էր պրն Թորոսյանը:- Ծայրահեղության դրսեւորումները պարզապես չեն ընկալվում այդ միջավայրում: Եվ այս առումով՝ վախենում եմ, որ մեր ընդդիմության նկատմամբ ձեւավորվեն որոշակի կարծիքներ»: Շավարշ Քոչարյանն այս առնչությամբ պարզաբանեց, որ ինքը Դիտարկման հանձնաժողովում առարկել է ոչ թե ամբողջ զեկույցին եւ բոլոր բանաձեւերի վերաբերյալ փաստարկներին. «այլ միայն այն հատվածին, որ վերաբերում է 1374 բանաձեւի կատարման գնահատականին, եւ պնդում եմ, որ Յասկերնիան օբյեկտիվ չի արտահայտել իրավիճակը: Ինչ վերաբերում է նրան, թե աջակցել են կամ ոչ՝ անդրադառնանք բանաձեւի նախագծում կատարված փոփոխություններին: «Գոհունակություն» բառը հանելու առաջարկս անցավ: «Ա1+»-ի վերաբերյալ ես էլ առաջարկ ունեի, ուկրաինացի պատգամավոր Հոլովատին էլ. ես իմ առաջարկը հանեցի՝ նրանն անցավ: Մի սկզբնական ձեւակերպում կար Յասկերնիայի զեկույցում, թե գրեթե լուծված է վարչական կալանքին վերջ դնելու հարցը եւ այլն՝ Արեւմուտքից մեկ այլ պատգամավոր առաջարկ արեց, թե՝ ոչ թե լուծված է, այլ կլուծվի՝ օրենքի փոփոխությունից հետո: Այսինքն՝ իրականությունն այնպես չէ, ինչպես ներկայացրել է պրն Թորոսյանը»: Այսինքն՝ արդարացվա՞ծ չէ այն վախը, թե մեր ընդդիմադիրներին կհամարեն ծայրահեղական: «Երեւի ավելի ճիշտ կլիներ մտածել ոչ թե իմ, այլ երկրի հեղինակության մասին,- խորհուրդ տվեց պրն Քոչարյանը:- Ես իմ հեղինակության համար հանգիստ եմ. բավական նորմալ հարաբերություններ ունեմ՝ այն պատգամավորի համար, որ ընդամենը 1 տարի է վեհաժողովում: Ինձ ավելի շատ մտահոգում է Հայաստանի հեղինակությունը, որն առաջին հերթին ձեւավորվում է ոչ թե ընդդիմության, այլ իշխանության շնորհիվ, որը մեր երկիրը, ցավոք, վարկաբեկում է իր կեղծ հաշվետվություններով»: Ա. Ի.
