ԱԺ պատգամավոր Հակոբ Հակոբյանը (Էջմիածին) հայտարարությունների ժամին հարց բարձրացրեց, թե ինչու պատգամավորները 13-րդ աշխատավարձ չեն ստանում եւ ինչու ԱԺ նախագահը, խախտելով կանոնակարգ օրենքը, հանդես չի գալիս տարեկան ֆինանսական հաշվետվությամբ։
Երեկ ԱԺ պատգամավորը ճեպազրույցի ժամանակ կրկնեց իր հարցերը. «Հարց եմ բարձրացրել, որ հաշվետվությամբ հանդես գա։ Ինչ վերաբերում է 13-րդ աշխատավարձին, կառավարության կողմից գումար է փոխանցվել ԱԺ եւ, կանոնակարգի համաձայն, ԱԺ նախագահը իրավունք ունի դիմել ֆինանսների նախարարին, որպեսզի այդ տողը փոխեն եւ այդ գումարները ծախսեն մեկ ուրիշ նպատակի համար։ Այդ իրավունքը ԱԺ նախագահն ունեցել է, դիմել է ֆինանսների նախարարություն, այնտեղից թույլտվություն է ստացել եւ այդ 65 հազար դոլարը ծախսել է այլ նպատակների համար»։
Ճեպազրույցից հետո «Առավոտը» դիմեց ԱԺ աշխատակազմի ղեկավար Հայկ Քոթանյանին՝ Հակոբ Հակոբյանի այս եւ էլի մի քանի հարցերի պատասխանը ստանալու համար։ Աշխատակազմի ղեկավարի պարզաբանումը հետեւյալն է. «ԱԺ կանոնակարգով ԱԺ գործունեության մասին ԱԺ նախագահի ֆինանսական հաշվետվություն նախատեսված չէ: Օրենքն ասում է, որ ԱԺ նախագահը իրավունք ունի, այլ ոչ թե պարտավոր է տարեկան հաղորդումներով հանդես գալ ԱԺ-ում: Հաղորդման ու հաշվետվության մեջ կան տարբերություններ՝ հաղորդումը ներկայացվում է ի գիտություն: Ինչ վերաբերում է գումարներին, մենք դոլարով գումարներ չենք ստանում, ՀՀ պետական բյուջեն ձեւավորվում է դրամով։ Պատգամավորների աշխատանքի վարձատրությունը կարգավորվում է օրենքով, որով նախատեսված է ամսական աշխատավարձ, եւ պատգամավորական գործունեության համար որոշակի գումար, այսպես կոչված՝ 13-րդ աշխատավարձ օրենքով չի նախատեսվում: Մեզ հայտնի չէ, թե ինչ 65 հազար դոլարի մասին է խոսքը։ Նման գումար մենք չենք ստացել։ Բյուջեով նախատեսված՝ կառավարության պահուստային ֆոնդից գումարները հատկացվում են կառավարության որոշմամբ՝ նպատակային ծախսերի համար։ Կառավարության որոշմամբ ԱԺ-ին հատկացվել է գումար՝ ԱԺ աշխատակազմի աշխատողներին տարեվերջյան հավելյալ վարձատրության համար, որը կարգավորվում է ՀՀ քաղծառայողների վարձատրության մասին օրենքով։ Ուրիշ գումար կառավարությունը ԱԺ-ին չի հատկացրել։ Հայտնի է, որ կառավարության կողմից հատկացված նպատակային գումարը հնարավոր չէ այլ նպատակի ծառայեցնել մի պարզ պատճառով՝ գանձապետական բաժանմունքների կողմից գործարքը չի կատարվի։ Ուզում եմ տեղեկացնել նաեւ, որ ԱԺ-ի աշխատակազմի եւ Վերահսկիչ պալատի համար պահեստային տնտեսության տարածքում լրացուցիչ աշխատասենյակներ կառուցելու համար գումարի հատկացումը նախատեսվել էր 2002-ի դեկտեմբերին՝ 2003-ի պետական բյուջեն հաստատելիս, իսկ այդ ժամանակ Արթուր Բաղդասարյանը դեռեւս ԱԺ նախագահ չէր։ Ի դեպ, երկու օր շարունակ խմորվող իրադարձությունների մասին հարկ եմ համարում ասել՝ չորեքշաբթի օրը, կառավարության հետ հարցուպատասխանից հետո՝ Հակոբ Հակոբյանը իմ ներկայությամբ մոտեցավ ԱԺ նախագահին, ներողություն խնդրեց եւ ասաց, որ իր հարցը սխալ է ընկալվել»:
Սեփ. լր.
