ԸՆԴՈՒՆԵԼՈՒԹՅԱՆ ՔՆՆՈՒԹՅՈՒՆՆԵՐԻՑ ՀԵՏՈ Ջոկողություն Երեկ ԿԳ նախարար Ս. Երիցյանը ստորագրել եւ բուհերի ռեկտորներին է հանձնել արդեն ուսանող դարձած դիմորդների ցուցակները: Հանրապետական ընդունող հանձնաժողովի ամփոփիչ նիստին նախարարը հանձնարարել է կանչել միայն «Հայլուրին»՝ «փաստն արձանագրելու»: Նիստի վերջում մի կերպ ներս էին խցկվել նաեւ «Շանթի» ու «ԱԼՄ»-ի թղթակիցները: Հիշենք՝ անցյալ տարի այս արարողությունը նախարարը բավական մեծ շուքով նշեց՝ հրավիրելով բոլոր լրատվամիջոցներին ու շնորհակալություն հայտնելով՝ քննություններին նրանց մասնակցության համար: Այս տարի, սակայն, արհամարհված են ոչ միայն լրագրողները: Մեր տվյալներով, նախարարը ողջ քննաշրջանում Հանրապետական ընդունող հանձնաժողովի ոչ մի նիստ չի հրավիրել, ընթացիկ որեւէ հարցի շուրջ հանձնաժողովի հետ քննարկում չի անցկացրել, որոշումները կայացրել է միանձնյա, աշխատել է ուղիղ հաշվիչ կենտրոնի հետ՝ առանց «ավելորդ» միջնորդների: Իսկ երեկվա նիստում նախարարը փորձել է բացատրել, թե ինչպես պատահեց, որ ընթացիկ վատ ցուցանիշներից հետո հանկարծ անցողիկ միավորների անակնկալ բարձրացում եղավ: Նա, ինչպես փոխնախարար Արա Ավետիսյանը «Առավոտին» տված հարցազրույցում, բացատրել է, թե բարձր շեմը ձեւավորվել է հիմնականում անգլերենի ու հայերենի քննությունների բարձր արդյունքներից: Իսկ այս առարկաների բարձր արդյունքներն էլ արդեն մի քանի տարի նույն շտեմարանից վարժվելու եւ անգիր անելու արդյունք է:
