ԿԱԶՈՆԻՆ ՍՏԱՆՁՆԵՑ ՀԱՎԱՔԱԿԱՆԻ ՂԵԿԸ
Երեկ կայացավ ՀՖՖ նախագահ Ռուբեն Հայրապետյանի եւ Հայաստանի ֆուտբոլի
ազգային հավաքականի նորանշանակ մարզիչներ Բեռնար Կազոնիի ու Բեռնար Պարդոյի
մամուլի ասուլիսը:
Ինչպես արդեն հայտնել էինք, Կազոնին եւ Պարդոն ֆրանսիացի փորձառու ֆուտբոլիստներ եւ մարզիչներ են, խաղացել ու մարզել են իրենց երկրի ուժեղագույն թիմերը։
Ռ. Հայրապետյանը տեղեկացրեց, որ Կազոնիի եւ Պարդոյի ընտրությունը կատարվել է 8-10 թեկնածությունների քննարկումից հետո: Նրանք աշխատելու են միայն հավաքականների հետ եւ կոորդինացնելու են նաեւ մանկապատանեկան ֆուտբոլը հանրապետությունում, ինչպես ընդունված է աշխարհում: Խոսելով աշխարհի առաջնության ընտրական մրցաշարին Հայաստանի մասնակցության մասին` ՀՖՖ նախագահը նշեց, որ իրատեսական չի լինի թիմից պահանջել մտնել եզրափակիչ: Այդպիսի պահանջ չի դրված նաեւ նորանշանակ մարզիչների առջեւ: Սակայն կոնկրետ խնդիրներ կդրվեն, երբ նրանք մոտիկից ծանոթանան հայկական ֆուտբոլին եւ հավաքականին: Անդրադառնալով եվրոգավաթների խաղարկությանը հայկական ակումբների մասնակցությանը` Ռ. Հայրապետյանը դրանք գնահատեց անբավարար եւ դրա գլխավոր պատճառներից մեկը համարեց բարձրակարգ մարզիչների բացակայությունն ակումբներում:
Ազգային հավաքականի նորանշանակ գլխավոր մարզիչ Բեռնար Կազոնին լրագրողներին պատմեց իր ծրագրերի մասին, որոնք ինքը մտադիր է իրականացնել Հայաստանում:
Ա. Հ.
