Եվրոպան՝ սարսափի մեջ
Եվրոպան բառի բուն իմաստով պապանձված է: Եվրոպացիների հիշողության
մեջ բոլորովին թարմ են մարտի 11-ին Իսպանիայում տեղի ունեցած եւ 192 մարդու
կյանք խլած ահաբեկչության ահասարսուռ պատկերները, եւ ահա՝ նոր ու բավականաչափ
ռեալ վտանգ: Լրացել է մոլորակի թիվ մեկ ահաբեկիչ Բեն Լադենի՝ Իրաքում զորամիավորումներ
ունեցող եվրոպական երկրներին ներկայացրած եռամսյա վերջնագրի ժամկետը, ինչին
հաջորդել է «առաջիկա օրերին Եվրոպան արյան բաղնիք դարձնելու» նոր սպառնալիքը:
Եվրոպական փորձագետների կարծիքով, այն բավականաչափ հիմնավոր է, քանի որ անմիջականորեն
հնչեցվել է «Աբու Հաֆսա Ալ-Մասրիի բրիգադներ» իսլամիստական խմբավորման կողմից:
Սա այն խմբավորումն է, որը տառացիորեն մի քանի օր առաջ վերջնականապես խոստովանեց,
թե հենց ինքն է «իսպանական» ահաբեկչության հեղինակը, ու նաեւ հաստատեց, որ
անմիջական առնչություններ ունի «Ալ-Ղաիդա»-ի հետ:
«Աբու Հաֆսա»-ի բրիգադներն իբրեւ իրենց առաջին թիրախ ընտրել են Իտալիան ու այս երկրի վարչապետ Սիլվիո Բեռլուսկոնիին: «Մենք Եվրոպայի քաղաքներին կստիպենք դողալ ու կսկսենք քեզնից, Բեռլուսկոնի: Մենք դա կանենք ամենաարյունալի միջոցներով ու այնքան ժամանակ, քանի դեռ դուք շիտակ ճանապարհi չեք վերադարձել»,- ասվում է խմբավորման՝ իսլամական սայթերից մեկում հրապարակած հայտարարության մեջ: Սպառնալիքը տարածվում է նաեւ Իտալիայի, ինչպես նաեւ եվրոպական մի քանի այլ «համր» ժողովուրդների վրա: «Այդ ժողովուրդների լռությունը միայն հաստատում է այն, որ նրանք հավանությամբ են վերաբերվում իրենց երկրների ղեկավարների գործողություններին»,- հիշյալ հայտարարության մեջ իրենց սպառնալիքն են զարգացնում ահաբեկիչները: Ընդ որում, վերջին օրերին նույնաբովանդակ բազմաթիվ այլ սպառնալիքներ են հնչել նաեւ արաբական մի շարք հեռուստաընկերությունների եթերում:
Եվրոպական երկրների, մասնավորապես՝ Իտալիայի ուժային կառույցներն ու հատուկ ծառայությունները փութով բերվում են պատրաստականության ամենաբարձր աստիճանի: Ձեռք են առնվում անվտանգության ապահովման աննախադեպ միջոցառումներ: Այս ամենով հանդերձ, Եվրոպայում մի տեսակ կարծես հաշտվել են այն մտքի հետ, որ ահաբեկչական ակտերը, անկախ ամեն ինչից, միեւնույն է, տեղի են ունենալու, եւ հաջորդ թիրախն իսկապես լինելու է Իտալիան: Այսպիսի կարծիք է հայտնել իտալական թերթերից մեկը՝ նաեւ չբացառելով, որ ահաբեկիչների սպառնալիքները գուցեեւ մնացյալ եվրոպական երկրների զգոնությունը թուլացնելու նպատակ ունեն:
Ներկայումս Իրաքում են գտնվում եվրոպական յոթ երկրների զորամիավորումներ: Այդ երկրներն են՝ Մեծ Բրիտանիան, Իտալիան, Լեհաստանը, Ռումինիան, Դանիան, Հոլանդիան եւ Ուկրաինան: Ապրիլին Իսպանիայում սոցիալիստների հաղթանակից հետո այս երկրի նոր իշխանություններն Իրաքից դուրս բերեցին իրենց զինծառայողներին:
ՏԻԳՐԱՆ ԱՎԵՏԻՍՅԱՆ
