Երեկ գլխավոր դատախազության հասարակայնության հետ կապերի եւ լրատվության բաժինը տարածել է պաշտոնական հաղորդագրություն՝ կապված «Գրիգոր Նարեկացի» համալսարանի հետ։
Դեռեւս 2000թ. դեկտեմբերից կրթական գործունեություն ծավալելու իրավունքից զրկված «Գրիգոր Նարեկացի» համալսարանի ինքնահռչակ ռեկտոր Իսաբեկ Գրիգորի Ալեքսանյանը, որը հանրությանը ներկայանում է Հրազդան Հայկենց անունով, պաշտոնեական լիազորությունները չարաշահելու եւ ուսանողներից կաշառք ստանալու համար Երեւանի Կենտրոն եւ Նորք-Մարաշ համայնքների առաջին ատյանի դատարանի 2003 թվականի օգոստոսի 21-ի դատավճռով դատապարտվել է ուղղիչ աշխատանքների՝ մեկ տարի ժամանակով եւ տուգանվել է 340 հազար դրամով։
Սակայն հետագայում փաստաթղթային տարբեր կեղծիքների միջոցով Իսաբեկ Ալեքսանյանը ստեղծել է «Կոտայքի մարզի պետական համալսարան» պետական գրանցում չունեցող ուսումնական հաստատությունը, Սիսիանում եւ Նոյեմբերյանում բացել է մասնաճյուղեր, ուսանողներ հավաքագրել Արցախում, ուսանողներից գանձել ուսման վարձ եւ տվել, ըստ էության, կեղծ դիպլոմներ եւ ավարտական վկայականներ։
Փաստաթղթերը կեղծելու եւ խարդախության համար Իսաբեկ Ալեքսանյանը ձերբակալվել է, նրան մեղադրանք է առաջադրվել ՀՀ քրեական օրենսգրքի 325 հոդվածի 1-ին մասով եւ 178 հոդվածի 2-րդ մասի 3-րդ կետով։
Հավելենք, որ «Առավոտն» այս ամենի մասին գրել էր 1,5 տարի առաջ:
