Իր «գյորա» հասկացավ ԵԱՀԿ ԽՎ նախագահի հատուկ ներկայացուցիչ Գյորան Լենմարկերն ԱԺ փոխնախագահին նամակով շնորհակալություն էր հայտնել Ղարաբաղ այցելելու հնարավորության համար եւ հայտնել, թե «այդ այցը օգնել է իրեն ավելի լավ հասկանալ իրավիճակը, հատկապես՝ փախստականների եւ բնակության վայրը փոխածների մասով»։ Այդ մասին «Առավոտին» տված հարցազրույցում հունիսի 16-ին պատմել էր ԱԺ փոխնախագահ Վահան Հովհաննիսյանը: Իսկ թե ինչպես էր հասկացել իրավիճակը փախստականների մասով պրն Լենմարկերը՝ պարզ դարձավ օրերս, երբ նա Էդինբուրգում աշխատանքները սկսած ԵԱՀԿ Խորհրդարանական վեհաժողովի ընթացքում Հայաստանի եւ Ադրբեջանի պատվիրակների ուշադրությանը ներկայացրեց ղարաբաղյան հակամարտության ներկայիս վիճակի մասին իր զեկույցը: Ադրբեջանական լրատվամիջոցները հաղորդեցին, թե Լենմարկերի զեկույցում հատուկ ընդգծված է «գրավյալ տարածքների ազատագրման եւ փախստականներին վերադարձնելու անհրաժեշտությունը»: Իսկ ըստ ադրբեջանական պատվիրակության անդամ Սաթար Սաֆարովի՝ Լենմարկերի պատրաստած փաստաթղթում նաեւ դատապարտվում է «զավթողական քաղաքականությունն ու էթնիկական սեպարատիզմը»: Քանի որ հայաստանյան պաշտոնյաները միշտ խորհուրդ են տալիս չհավատալ ադրբեջանական լրատվամիջոցներին՝ փորձեցինք ԵԱՀԿ-ում Հայաստանի պատվիրակության անդամ Արտաշես Գեղամյանից ստանալ Լենմարկերի զեկույցին վերաբերող հարցերի պատասխանները: «Զեկույցի մասին տեղեկացվեցի Էդինբուրգ գալու օրը. այն է, որ մեկնումից 2 օր առաջ մեր պատվիրակության ղեկավար Վահան Հովհաննիսյանը ստացել է փաստաթղթի անգլերեն տարբերակը,- ասաց պրն Գեղամյանը:- Սակայն պրն Լենմարկերն այստեղ մշտական կոմիտեի նիստում, որտեղ քննարկվում էր օրակարգը, միայն կարճ հաղորդագրությամբ հանդես եկավ, ուր մասնավորապես ասաց, թե առաջիկայում նոր հրապարակվելու է այդ զեկույցը եւ դառնալու քննարկման առարկա: ԵԱՀԿ այս նստաշրջանում չի քննարկվել այդ զեկույցը»: Այնուամենայնիվ՝ արդյոք այդ փաստաթուղթը պարունակո՞ւմ է բոլոր այն ձեւակերպումները, որոնք մեջբերվել էին ադրբեջանական մամուլում. այս հարցին ի պատասխան՝ Արտաշես Գեղամյանն ասաց. «Ավա՜ղ, անգամ իսկ խստապահանջ «Հայլուրին» չգոհացնող իմ անգլերենի իմացությունն այնուամենայնիվ բավարար է՝ վկայելու համար, թե ադրբեջանական լրատվամիջոցների տարածած հաղորդագրությունները համապատասխանում են պրն Լենմարկերի կողմից թե՛ Հայաստան, թե՛ Ադրբեջան ուղարկած զեկույցի ոգուն եւ շնչին»: Այս առնչությամբ արժե դարձյալ անդրադառնալ Վահան Հովհաննիսյանի վերոհիշյալ հարցազրույցին: Այստեղ նա նշել էր, թե ԵԱՀԿ-ն «յուրաքանչյուր նոր առաջարկությամբ ավելի ռեալիստական հիմքեր է դնում, եւ դրանք մեզ սկսում են ավելի ու ավելի հարազատ թվալ։ Այսինքն՝ սա ապացույց է մեր դիրքերի ճշմարտության»։ Սակայն մի՞թե Լենմարկերի զեկույցում այժմ օգտագործված ձեւակերպումները հարազատ են Հայաստանի որեւէ իշխանավորի: Բացի այդ՝ պրն Հովհաննիսյանը բողոքել էր, թե Ղարաբաղ այցի ընթացքում ԵԱՀԿ ԽՎ հայաստանյան պատվիրակության անդամներից ինքը միայնակ է ուղեկցել Լենմարկերին, քանի որ Գեղամյանը «բոյկոտի քաղաքականություն է վարում, այդ թվում նաեւ Հայաստանի եւ հայ ժողովրդի անմիջական շահերին վերաբերող հարցերում չի համագործակցում մեզ հետ»։ Առանց չարախնդության հարցնենք՝ այս զեկո՞ւյցն է Հայաստանի անմիջական շահերին վերաբերող հարցերում իշխանության գործունեության արդյունքը: Ա. ԻՍՐԱՅԵԼՅԱՆ
