ԱՌԱՋԻՆ ՏՈՒՐՆ ԱՎԱՐՏՎԵՑ

ԱՌԱՋԻՆ ՏՈՒՐՆ ԱՎԱՐՏՎԵՑ Պորտուգալիայում «Եվրո-2004»-ի խմբային մրցաշարի առաջին տուրն ավարտվեց «D» խմբում ընդգրկված հավաքականների հանդիպումներով: Ավեյրուում հանդիպեցին Լատվիան եւ Չեխիան: Այս զույգի առաջատարն, անկասկած, չեխերն էին, որոնց հաղթանակը ոչ ոքի կասկածը չէր հարուցում: Ճիշտ է, հանդիպման վերջնական հաշիվն ի վերջո գրանցվեց չեխերի օգտին, սակայն դա նրանց հաջողվեց ուժերի գերագույն լարումով: Լատիշներն իրենց ամենեւին էլ Եվրոպայի առաջնությունների նորեկ չէին զգում: Ավելին, նրանք արժանի դիմադրություն էին ցուցադրում ահեղ մրցակցին, իսկ որոշ խաղային դրվագներում նույնիսկ գերազանցում էին: Հանդիպման առաջին խաղակեսն անցավ փոխնիփոխ գրոհներով, սակայն ճշգրիտ հարվածի չէին հասնում: Այդպես շարունակվեց մինչեւ 45-րդ րոպեն: Հանդիպման գլխավոր մրցավարը ավելացրեց ժամանակը եւ մեկ րոպե էլ չանցած՝ մերձբալթիկցիներից Վերպակովսկին հասավ հաջողության՝ 1:0: Այդ հաշվով էլ թիմերը գնացին հանգստի: Ընդմիջումից հետո, բնականաբար, չեխերը հավասարակշռությունը վերականգնելու նպատակով անցան ակտիվ գործողությունների: Այդուհանդերձ, նրանց բոլոր ջանքերը ցանկալի արդյունք չէին տալիս: Եվ միայն 73-րդ րոպեին Բարոշը հավասարեցրեց հաշիվը: Դրանից հետո չեխերն արդեն սկսեցին պայքարել հաղթանակի համար: Ու վարձահատույց եղան 85-րդ րոպեին: Երկրորդ եւ հաղթական գոլը խփեց Հայնցը: Օրվա կենտրոնական հանդիպումն, անշուշտ, Պորտուում կայացած Գերմանիա-Հոլանդիա խաղն էր: Երկու հավաքականներն էլ հայտնի են իրենց բարձր կարգով: Այնպես որ, խաղադաշտում ծավալվող ամեն մի իրադարձություն մեծագույն հաճույք էր պատճառում ֆուտբոլասերներին: Առաջինը հաջողության հասան գերմանացիները: 30-րդ րոպեին հաշիվը բացեց Ֆրինգսը: Մոտ 50 րոպե հոլանդացիները պայքարում էին պարտությունից խուսափելու համար: 81-րդ րոպեին նրանք աջ եզրով հերթական գրոհը կազմակերպեցին: Գնդակը ուղարկվեց տուգանային հրապարակ, որտեղ պաշտպանի հետ պայքարում Վան Նիստելրոյը գեղեցիկ «մկրատ» հարվածով գնդակն ուղարկեց Օլիվեր Կահնի պաշտպանած դարպասը: «D» խմբի մրցաշարային աղյուսակ 1. ՉԵԽԻԱ 1 1 0 0 2-1 3 2. ԳԵՐՄԱՆԻԱ 1 0 1 0 1-1 1 3. ՀՈԼԱՆԴԻԱ 1 0 1 0 1-1 1 4. ԼԱՏՎԻԱ 1 0 0 0 1-2 0