Երեկ ՀՀ սպորտպետկոմի Թումանյան փողոցի մասնաշենքում շինարարության նախապատրաստական աշխատանքներ էին սկսվել:
Այդ առիթով խոսակցություններ են ծավալվել, թե սպորտի պետական կառույցի ղեկավարությունը շենքը վաճառել է «Մուլտի Գրուպ» կոնցեռնի հիմնադիր-նախագահ, ԱԺ պատգամավոր Գագիկ Ծառուկյանին, որն էլ հայտնի չէ, թե ինչի կվերածի երեւանցիների համար մարզական պատմության հիշողության խորհրդանիշ համարվող կառույցը: Փորձեցինք պարզել, թե ինչ է իրականում տեղի ունենում: Եվ քանի որ Սպորտպետկոմի նախագահն աշխատանքի բերումով հանրապետությունից բացակայում էր, մեկնաբանություններ տվեց նրա տեղակալ Միքայել Իսպիրյանը:
«Նման ասեկոսեներն առնվազն չիմացության արդյունք են, եթե չասենք` չարախոսության,- ասաց նա:- Իրականությունը հետեւյալն է. Սպորտպետկոմի շենքը երկար տարիներ հիմնական նորոգման չի ենթարկվել ու բարոյապես մաշվել է: Նկուղային հարկում գտնվող լողավազանի խոնավությունը խարխլում է կառույցի հիմքերը: Տանիքն էլ հին է եւ ընթացիկ նորոգումները, որ ի վիճակի ենք անել, հարցերը չեն լուծում: Կան նաեւ շենքի պահպանման օրախնդիր այլ հարցեր, որոնց թվարկումը միայն շատ ժամանակ կխլի: Ստեղծված իրավիճակից, անշուշտ, ելք պետք էր գտնել, բայց այնպիսի, որ բոլորիս համար իսկապես թանկ այս շենքն ամբողջությամբ մնար սպորտի ոլորտում: Այդ պատճառով էլ բանակցություններ են վարվել Գագիկ Ծառուկյանի հետ, որի արդյունքում ծրագրերը մտցվել են կառավարություն ու պաշտոնական որոշման տեսք ստացել:
Պարոն Ծառուկյանը ամբողջությամբ վերանորոգելու է շենքը: Ավելին, «գորտանոցի» տեղում լինելու է սպորտային փառքի թանգարան, որի կարիքը վաղուց է զգացվում: Նոր տեսք ու բարվոք վիճակ է ունենալու նկուղային հարկում գտնվող բռնցքամարտի դահլիճը:
Շենքի բակում կառուցվելու է մի նոր դահլիճ, որը հավանաբար կծառայի ծանրամարտին կամ ըմբշամարտին: Հիմնովին նորոգվելու է Սպորտպետկոմի տանիքը, մեծացվելու են նիստերի եւ հանդիսությունների սրահը, աշխատասենյակները, հարկաբաժինները ու այդ բոլորը մնալու է Սպորտպետկոմին: Այնպես որ, շենքից ոչ միայն մեկ քառակուսի մետր չի օտարվելու, այլեւ ընդհակառակը՝ ավելանալու է»:
ԱՇՈՏ ՀԱԿՈԲՅԱՆ
