ԲԱՐԵԳՈՐԾԱԿԱՆ ՀԱՄԵՐԳԱՇԱՐԸ ՍԿՍՎԱԾ Է Մայիսի 3172ից մեկնարկել են միջազգային մրցույթի դափնեկիր Կարեն Շահգալդյանի հայաստանյան բարեգործական համերգները: Այս մասին երեկ տեղեկացրին Մշակույթի զարգացման բարեգործական հիմնադրամի շենքում հրավիրված մամլո ասուլիսում: Բացի Երեւանից, ջութակահարը մենահամերգներ կունենա Վանաձորում եւ Սպիտակում: Նրան կնվագակցի միջազգային մրցույթի դափնեկիր, դաշնակահարուհի Եկատերինա Լեդենովա-Բեյլերյանը: Կ. Շահգալդյանը Հայաստանի պետական ֆիլհարմոնիկ նվագախմբի կամերային կազմի հետ (դիրիժոր՝ Ռուբեն Ասատրյան) մայիսի 8-ին հանդես կգա Գյումրիում, 9-ին՝ Կամերային երաժշտության տանը, 12-ին՝ Հայաստանում ՌԴ դեսպանատանը: Ի դեպ, Կարեն Շահգալդյանը երկրորդ հայն է, որ նվագում է Ստրադիվարիուսի ջութակով: Այս առիթով նա կատակեց. «Հուսով եմ՝ Ռուբեն Ահարոնյանի հետ կատարված պատմությունը գլխիս չի գա եւ ջութակս չեն գողանա»: Շահգալդյանը ծնվել եւ երաժշտական կրթություն է ստացել Մոսկվայում, այդ պատճառով չի խոսում հայերեն: Ջութակահարը 2 տարի առաջ ամուսնացել է երեւանցի հայուհու հետ, որը կօգնի ամուսնուն մինչեւ տարվա վերջ տիրապետել պապերի լեզվին: Առաջին անգամ Կ. Շահգալդյանը Հայաստան է եկել տարիներ առաջ՝ «Մոսկվայի վիրտուոզների» կազմում: Համերգաշարը, որի կազմակերպիչներն են «Բրավիսիմո», «Օվացիա» պրոդյուսերական կենտրոնները եւ Մշակույթի զարգացման հիմնադրամը, կավարտվի մայիսի 14-ին: Ամենուրեք մուտքը կլինի անվճար: Ջութակահարի կարծիքով, բարեգործական ակցիան նպատակ ունի անվճարունակ, բայց ինտելեկտուալ հանդիսատեսին կրկին վերադարձնել համերգային դահլիճներ: Դիրիժոր Ռուբեն Ասատրյանը ողջունելով Կ. Շահգալդյանի նախաձեռնությունը, փաստեց, որ վերջին տարիներին հաճախականության եւ քանակի առումով ընդլայնվել են դրսի երաժիշտների հետ կապերը: Պրն Ասատրյանը երիտասարդ ջութակահարին բնորոշեց իբրեւ պրոֆեսիոնալ՝ նկատի ունենալով նրա համերգաշարի ծրագիրը (համաշխարհային դասական երաժշտության ընտրանի՝ Բախ, Վիվալդի եւ այլն): Նախատեսված է անակնկալ՝ ջութակահարը կկատարի նաեւ հայ կոմպոզիտորի ստեղծագործություն: Թե ում՝ առայժմ չասաց: Մայիսի 16-ին Կ. Շահգալդյանը կմեկնի ԱՄՆ՝ մենահամերգների: Ջութակահարը խոստովանեց, որ տարիներ առաջ իրեն ամաչեցրել է մի ամերիկացի՝ նվիրելով Ալան Հովհաննեսի ստեղծագործությունների CD-ն: Պարզվում է, ի տարբերություն Կարենի, ամերիկացին հրաշալի գիտեր ոչ միայն Ալան Հովհաննեսի ծագումը, այլեւ ստեղծագործական ողջ ժառանգությունը: ԳՈՀԱՐ ՀԱԿՈԲՅԱՆ
