«ՎԵՐՋՆԱԳՐԵՐՈՎ ՉԵՆՔ ՀԱՍՆԻ ՔԱՂԱՔԱԿԱՆ ԵՐԿԽՈՍՈՒԹՅԱՆ» Ասում է ԱԺ նախագահ Արթուր Բաղդասարյանը – Պրն Բաղդասարյան, ապրիլի 12-ին պատգամավորների մի խումբ ուզում էր հանդիպել Ձեզ հետ, նրանց արգելվեց ԱԺ մտնել, Դուք դուրս չեկաք: Չե՞ք գտնում, որ Դուք մի կողմ քաշվեցիք: – ԱԺ նախագահ ընտրվելուց հետո որեւէ պատգամավոր դժվարություն չի ունեցել ինձ հանդիպելու կամ հեռախոսազրույց ունենալու խնդրում: Ավելին, վերջին մի քանի լարված օրերին հանդիպումներ եմ ունեցել ԱԺ-ում ընդդիմադիր խմբակցությունների ղեկավարների եւ անդամների հետ՝ քննարկելով ներքաղաքական իրավիճակից դուրս գալու քայլերը: Դրանից զատ, նրանց հետ ունեցել եմ բազմաթիվ հեռախոսազրույցներ՝ նրանց խնդրանքով խոսելով իրավապահ մարմինների հետ, նրանց ունեցած խնդիրների մասին: Ինչ վերաբերում է ապրիլի 12-ին, ապա դուք քաջատեղյակ եք, որ Աժ-ում նիստը չկայացավ՝ հենց ավելորդ լարվածությունն է՛լ ավելի չսրելու նկատառումներից ելնելով: Ժամը 18-ից հետո ես դուրս եմ եկել շենքից: Այնպես որ, չընդունելու խնդիր չկա եւ երբեք էլ չի եղել, իմ դուռը միշտ էլ բաց է պատգամավորների առաջ: Ավելին, հենց նույն օրը կեսօրին խոսել եմ պատգամավոր Վիկտոր Դալլաքյանի, այլ պատգամավորների հետ եւս եւ հանդիպման մասին որեւիցե խոսք չի եղել: – «Արդարություն» դաշինքի ղեկավար Ստեփան Դեմիրճյանն ասաց, որ գիշերը կատարվածի պատասխանատվությունը ընկնում է նաեւ Ձեզ վրա, որովհետեւ նստացույցի վրա հարձակված զորքը դուրս եկավ ԱԺ-ից: – Դա կամ Ստեփան Դեմիրճյանի սուբյեկտիվ կարծիքն է, կամ էլ նա տեղյակ չէ ԱԺ շենքի պահպանության գործող օրենքին, քանի որ համաձայն «Պետական պահպանության մասին» ՀՀ օրենքի՝ ԱԺ շենքի պահպանումը իրականացնում է ՀՀ ոստիկանությունը. ԱԺ նախագահը շենքի պահակը կամ պահպանություն իրականացնողը չէ: – Չե՞ք գտնում, որ կոալիցիան այս իրավիճակում պիտի արտահայտի իր քաղաքական դիրքորոշումը ոչ միայն ԱԺ նիստերից հրաժարվելով, այլեւ իրավիճակի գնահատականը տալով: – Կոալիցիան ԱԺ ապրիլի 12-14-ի նիստերը չի գումարել՝ այդ կապակցությամբ տալով հստակ քաղաքական մեկնաբանություն իր հայտարարությամբ: Եվ դեռ դժվար է ասել, թե՞ արդյոք ավելի վատ զարգացումներ չէին լինելու, եթե նիստը կայանար: Բացի այդ չմոռանանք, որ ընդդիմությունը արդեն տեւական ժամանակ է՝ ինչ չի մասնակցում ԱԺ նիստերին: Մինչդեռ իմ համոզմունքը եղել եւ մնում է այն, որ խորհրդարանում մենք պետք է գտնենք քաղաքական խնդիրների լուծման բանալին: Մենք խորհրդարան ենք եկել, որ փորձենք հենց այստեղ գտնել կնճռոտ հարցերի պատասխանը: Ինչ վերաբերում է կոալիցիայի քաղաքական գնահատականին ստեղծված իրավիճակի մասին, ապա դրա մասին կարծում եմ հստակ կասեն կոալիցիայի անդամ կուսակցությունները: – Ակնհայտ է, որ ռազմական գործողություններ տեղի ունեցան խաղաղ ու անզեն ցուցարարների դեմ, ո՞վ է պատասխան տալու բռնությունների համար եւ միջազգային ի՞նչ գնահատական կտրվի այս ամենին: – Նախ, չեմ կարծում, թե «ռազմական գործողություններ» են տեղի ունեցել: Փակվել էր Բաղրամյան պողոտան, դադարեցվել էր ճանապարհային երթեւեկությունը, որի հետեւանքով ոստիկանությունը փորձել է ճանապարհներ բացել եւ ապահովել նորմալ երթեւեկություն: Արդեն ասել եւ ասում եմ, որ ես դեմ եմ բռնություններին եւ դատապարտում եմ լրագրողների նկատմամբ տեղի ունեցածը: Մնացյալը պետք է պարզի քննությունը՝ որտե՞ղ եւ ինչի՞ց է սկսվել, ովքե՞ր են մեղավորները եւ այլն: Իմ կարծիքով՝ մենք նախ ինքներս պիտի հասկանանք ու գնահատական տանք մեր երկրում կատարվածի պատճառներին ու հետեւանքներին, ապա կլսենք այլոց մեկնաբանությունները: – Լուրեր են պտտվում, որ դատախազը պատրաստվում է մտնել խորհրդարան՝ պատգամավորներին ձերբակալելու խնդրով: Ձեր վերաբերմունքը՝ եթե դա տեղի ունենա: – Այս պահին որպես ԱԺ նախագահ ես տեղեկություններ չունեմ պատգամավորներին ձերբակալելու մասին: Իմ վերաբերմունքի մասին հստակ արտահայտվել եմ եւ մնում եմ իմ կարծիքին՝ քաղաքական գործունեության համար պատգամավորների ձերբակալություններին բացասաբար եմ վերաբերվում, քանի որ քաղաքական հարցերը պետք է լուծումներ ստանան քաղաքական դաշտում, իսկ քրեական հանցագործությունները պետք է պատժվեն քրեական օրենսգրքի համաձայն: – Ի՞նչ առաջարկություններ ունեք այս պահին՝ կապված ներքաղաքական իրավիճակի հետ: – Ես համոզված եմ, որ պետք է շարունակվեն քաղաքական խորհրդակցությունները, եւ մենք պետք է կարողանանք գտնել քաղաքական լուծումներ: Այդ կապակցությամբ արդեն արել եմ քաղաքական համապատասխան հայտարարություններ: Նորից եմ կրկնում, այն ինչ ասել եմ մի քանի օր առաջ: Վերջնագրերով մենք չենք կարող հասնել քաղաքական հանգուցալուծման, քանի որ դա կարող է ունենալ կարճաժամկետ, բայց ոչ երբեք երկարաժակետ դրական արդյունք՝ թե քաղաքական ուժերի, թե հասարակության համար: Առճակատումը, արհեստական լարումները միայն ավելի են բարդացնելու իրավիճակը: Միայն քաղաքական քննարկումները, կուտակված խնդիրները քաղաքական երկխոսության եւ բանակցությունների միջոցով լուծելը մեզ կարող է տանել դեպի զարգացում: ՄԱՐԳԱՐԻՏ ԵՍԱՅԱՆ
