«ԱՐԴԱՐՈՒԹՅԱՆ ՎԵՐԱԿԱՆԳՆՈՒՄ» Ռոբերտ Քոչարյանը երեկ գլխավոր դատախազության ղեկավար կազմին ներկայացնելով վերանշանակ գլխավոր դատախազ Աղվան Հովսեփյանին՝ ասել է, թե 1999-ին նա այդ պաշտոնից ազատվել էր ոչ թե աշխատանքում թերություններ ունենալու պատճառով, այլ՝ զուտ քաղաքական իրավիճակից ելնելով: «Կարծում եմ, սա նաեւ արդարության վերականգնում է»,- նշել է նա: «Արհեստավարժ, ամուր եւ սկզբունքային. ահա այսպիսին եմ ես ճանաչում Աղվան Հովսեփյանին 1981-ից»,- ասել է Ռոբերտ Քոչարյանը եւ ավելացրել, որ Աղվան Հովսեփյանը երկար տարիներ աշխատել է նաեւ ԼՂ-ում: Խոսելով դատախազության անելիքների մասին Ռոբերտ Քոչարյանը նշել է. «Այլ իրավապահ մարմինների համեմատությամբ՝ դատախազությունն իր տեղի եւ արժեւորման տեսանկյունից որոշակի առումով անկում է ապրել»: Նաեւ ընդգծել է, թե դատախազությունն իր կարեւոր տեղը պետք է ունենա կոռուպցիայի դեմ պայքարում, եւ պետք է ակտիվացնի իր գործունեությունը քրեական եւ այլ տեսակի հանցագործությունների դեմ պայքարում՝ պետական ունեցվածքի, սեփականության ու շահերի պաշտպանության տեսանկյունից: «Ամբողջ համալիրով ես շատ ավելի ակտիվ աշխատանք եմ ակնկալում դատախազությունից»,- շեշտել է նա: Միաժամանակ նշել է, թե այդ ամենին զուգահեռ՝ պետք է բացառվեն մասնավոր բիզնեսի, ձեռնարկատիրության մեջ միջամտության երեւույթները: Խոսքի ավարտին Ռոբերտ Քոչարյանը եւս մեկ անգամ ընդգծել է, որ դատախազությունը պարտավոր է իր լիազորություններով զբաղվել լիարժեքորեն. «Նոր դատախազից ձեզ հետ միասին ակնկալում եմ ավելի վճռական աշխատանք»: Սեփ. լր. Հ. Գ. Նախկին գլխավոր դատախազը՝ Արամ Թամազյանն «Ազատություն» ռ/կ-ին ասել է, թե այս պահին իրեն որեւէ այլ աշխատանք կամ պաշտոն չի առաջարկվել եւ առայժմ զբաղվելու է ընթերցանությամբ:
