Բրդի եւ «Լինսի» լվացում Օրեր առաջ «Առավոտն» ահազանգ ստացավ «Արարատի բրդի վերամշակում» ԲԲԸ-ի նախկին աշխատակիցներից, թե այրվում է բուրդ։ Նրանք կարծում էին` բուրդը իրեղեն ապացույց է ԲԲԸ-ի գործադիր տնօրեն Կոլյա Շաբոյանի դեմ հարուցված քրգործում։ Այս օրերին Կենտրոն եւ Նորք-Մարաշ համայնքների առաջին ատյանի դատարանի վարույթում է գտնվում գործադիր տնօրեն Կոլյա Շաբոյանի գործը։ Նա մեղադրվում է պաշտոնեական դիրքի չարաշահման, 2000թ. հունվարի 27-ից մինչեւ 2001թ. ապրիլի 11-ն ընկած ժամանակահատվածում «Արդշինբանկի» կողմից իրեն հանձնված 378 մլն դրամ վարկային գումարի հափշտակման մեջ։ Նախաքննությունն իրականացնող գլխավոր դատախազությունը պարզել էր, որ «Արդշինբանկ» եւ «Արարատի բրդի վերամշակում» ԲԲԸ-ների միջեւ «Լինսի» հիմնադրամի շրջանակներում կնքվել էր «ենթավարկի համաձայնագիր»։ «Լինսի» հիմնադրամի միջոցներից 432 մլն դրամը չգերազանցող գումար է ձեւակերպվել՝ ՀՀ փոքր եւ միջին բիզնեսի զարգացման համար, տարեկան 15% տոկոսադրույքով։ «Արդշինբանկի» կողմից սահմանվել էր ժամանակացույց, կնքվել էր պայմանագիր, որը վավերացվել էր նոտարական կարգով։ «Արարատի բրդի վերամշակում» ԲԲԸ-ի գործադիր տնօրեն Կոլյա Շաբոյանը վարկային պարտավորությունները կատարելուց դիտավորյալ կերպով խուսափելու նպատակով, հետագայում ընկերության անվճարունակության ճանաչման պահանջի հայցով դիմել է տնտեսական դատարան եւ դատարանի վճռով ճանաչվել է սնանկ»,- նշվել է մեղադրական եզրակացության մեջ։ Կոլյա Շաբոյանն իրեն մեղավոր չի ճանաչել եւ հայտնել է, որ որպես երաշխիք «Արդշինի» կողմից ստացված 378 մլն դրամ վարկային գումարի, գրավ է դրել «Արարատի բրդի վերամշակում» ԲԲԸ-ին սեփականության իրավունքով պատկանող գույքը։ Այս քրեական գործով անցել է թվով 18 վկա, նաեւ Լեւոն Ֆարմանյանը («Արդշինբանկի» տնօրեն), վարկային եւ ներդրումային քաղաքականության վարչության ծրագրային վարկային գործառնությունների բաժնի մասնագետ Կարեն Մանուկյանը։ 2003թ. հունիսի 24-ին Կոլյա Շաբոյանի նկատմամբ խափանման միջոց է կիրառվել ստորագրություն չհեռանալու մասին, ապա՝ կալանքը։ Բրդի եւ վարկերի լվացման գործընթացը շարունակվում է։ ՌՈՒԶԱՆ ՄԻՆԱՍՅԱՆ
