Բնապահպանների
կարծիքով, Երեւանում ներդրվող ապակենտրոնացված կամ լոկալ ջեռուցման համակարգը
հեռանկարային չէ ոչ տնտեսական, ոչ էլ բնապահպանական տեսանկյունից։
«Պատկերացրեք, մայրաքաղաքի շենքերի խտությունն ու ամեն մեկի տանիքից վեր ցցված ամենաքիչը 5 մետրանոց խողովակները։ Արտաքին տեսքից զատ, դրանք վտանգավոր վիճակ կարող են ստեղծել ոչ միայն ածխաթթու, այլեւ ջերմոցային գազերի նորմատիվային չափերը մթնոլորտում ավելացնելու առումով»,- օրերս «Առավոտին» տեղեկացրեց բնապահպանության նախարարության Շրջակա միջավայրի պահպանության վարչության պետ Արամ Գաբրիելյանը։ Ըստ նրա, Հայաստանն անդամագրվել է Կլիմայի փոփոխության համաշխարհային կոնվենցիային եւ պարտավոր է պահպանել ջերմոցային գազերի արտանետումը նվազեցնելու գծով ստանձնած պարտավորությունները։ «Այն, ինչ հիմա անում են (նկատի ունի որոշ շենքերում արդեն տեղադրված լոկալ ջեռուցման համակարգերը- Ռ. Ա.), պիտի գոնե թվերով հիմնավորված լինի, իսկ դրանք ոչ մի տեսանկյունից հիմնավորված չեն»։
Բնապահպանների ծրագիրը կենտրոնացված ջեռուցման ավանդական համակարգն է։ Համաշխարհային բանկի, ԱՄՆ միջազգային զարգացման գործակալության եւ Գլոբալ էկոլոգիական ֆոնդի տրամադրած 3 մլն դոլարով Երեւանում կստեղծվի տնտեսապես արդյունավետ, էկոլոգիապես նպաստավոր եւ էներգաէֆեկտիվ ջեռուցման կենտրոնացված համակարգ, որն ընդունված է եւ կիրառվում է առաջադեմ երկրներում։ Ի դեպ, փորձնական փուլի արդյունքներով պարզվել է, որ այսօրվա ջերմամատակարարները գործող նորմատիվներից 40-50%-ով ցածր ջեռուցում են ապահովել, սակայն գանձել են 100 տոկոսի հաշվարկով։
Մի առիթով «Առավոտն» անդրադարձել է ներկայիս կենտրոնացված ջեռուցման համակարգի կաթսայատներին՝ դրանց մեծ մասը պետք է վաճառվի որպես ազատ տարածք եւ միայն չնչին մասը կօգտագործվի լոկալ ջեռուցման համար։ Բնապահպանների առաջարկած ծրագրի համակատարողներից մեկն էլ, կառավարության որոշմամբ, Երեւանի քաղաքապետարանն է։ Նրա խնդիրներից է կաթսայատների համար տարածք հատկացնելը։ Ծրագրի կատարման ընթացքում կերեւա, թե հին կաթսայատներից որն է պահպանվել այդ նպատակի համար։
ՌՈՒԶԱՆ ԱՐՇԱԿՅԱՆ
