Բանակը ամեն մասնագետի կարիք էլ ունի՞ Երեկ տեղեկացրել էինք, որ Հայաստանի երիտասարդների ազգային խորհուրդը նախաձեռնել էր հանդիպում պաշտպանության նախարար Սերժ Սարգսյանի հետ, որի ժամանակ, ի թիվս այլ հարցերի, քննարկում պետք է անցկացվեր «Զինապարտության մասին» ՀՀ օրենքի նախագծի շուրջ: Հիշեցնենք, որ «Հանուն գիտության զարգացման» նախաձեռնող խումբը չէր մասնակցում հանդիպմանը, որովհետեւ վստահ էր, որ իրենց հնարավորություն չի տրվի կոնստրուկտիվ բանավեճ ծավալելու նախարարի հետ: Երեկ մեզ հետ զրույցում, ՀԵԱԽ նախագահ, ԱԺ պատգամավոր Վազգեն Խաչիկյանը նշեց, որ հանդիպման 80-90 տոկոսը նվիրվել է հիշյալ հարցի քննարկմանը, եւ հանդիպմանը մասնակցելու ցանկություն հայտնած մագիստրոսներին ու ասպիրանտներին հնարավորություն է տրվել բարձրացնել իրենց հուզող հարցերը: ՀԵԱԽ գլխավոր քարտուղար Մարկոս Շիրինյանը հանդիպման մասին պատմեց հետեւյալը. «Համոզված կարող եմ ասել, որ եթե ներկաների մի մասը ինչ-որ խնդիր էր տեսնում ու սուր հարցադրումով էր հանդես գալիս, վերջում ասում էր՝ այո, ես էլ եմ պատրաստ ծառայել: «Այո»-ն դառնում էր իրենց պատասխան խոսքի առաջին բառը՝ նախարարի խոսքից հետո: Բազմաթիվ երիտասարդներ եղան, որ ասում էին՝ «մենք գնալու ենք 2 տարի փչանանք (ի դեպ, շատ հանգիստ, անկաշկանդ մթնոլորտում էին նրանք խոսում): Հետո նախարարը բացատրում էր՝ ոնց, ով, որտեղ, ինչու»,- ասաց Մ. Շիրինյանը: Հանդիպման ժամանակ նաեւ մեկ տասնյակից ավելի մասնագիտություններ են հնչել եւ նախարարը բոլորի համար պատասխան է գտել՝ «նախարարն ասաց, որ կա բանակ, մի համակարգ, որտեղ բոլոր տիպի մասնագիտություններն էլ պետք են՝ սկսած ծրագրավորումից: Պաշտպանության նախարարությունն անցնում է ավտոմատ կառավարման, որտեղ 2500-ից ավելի համակարգիչ է լինելու»: Վազգեն Խաչիկյանը եւս հավաստիացնում է, որ ՊՆ-ում բոլորի համար էլ հաստիք կճարվի, ոչ թե գնալ, ասենք, դասադուլի: Հարցի առնչությամբ ՀԵԱԽ-ի առաջարկները տարբեր են, դրանք կներկայացվեն ավելի ուշ: Մ. Շիրինյանը խորհուրդ է տալիս հակառակ կողմին՝ հանդես գալ լուրջ առաջարկություններով: Մի նկատառում եւս. վիճարկելի օրենքի հետ գրեթե միաժամանակ շրջանառության մեջ մտած «Բարձրագույն եւ հետբուհական մասնագիտական կրթության մասին» ՀՀ օրենքի նախագծի հոդված 3-ի («Հայաստանի Հանրապետության պետական քաղաքականությունը եւ քաղաքացիների իրավունքների պետական երաշխիքները բարձրագույն եւ հետբուհական մասնագիտական կրթության բնագավառում») 2-րդ կետը պահանջում է «կրթության անընդհատություն, հաջորդայնություն եւ շարունակականություն»: Հ. ԲՈՒԴԱՂՅԱՆ
