Մրցաշրջան- 2003-ում ֆուտբոլի Հայաստանի առաջին խմբի առաջնության հաղթող Երեւանի «Կիլիկիան» նույնպես մարզումներն սկսել է դեկտեմբեր ամսից:
Վերադառնալով բարձրագույն խումբ՝ թիմն իր առջեւ լուրջ խնդիրներ է դրել եւ, ակումբի ղեկավարության խոսքերով, իրեն ամենեւին էլ նորեկ չի համարում: Ամանորյա տոներից հետո «Կիլիկիան» հունվարի 6- ից մարզվում է մայրաքաղաքում՝ «Կիլիկիա» մարզադահլիճում, եւ շաբաթական հինգ անգամ մարզումների ծրագրում կարեւոր դեր է հատկացնում նաեւ բացօթյա աշխատանքներին: Երկկողմանի խաղերից բացի, Ալբերտ Սարգսյանի սաներն արդեն հասցրել են ընկերական հանդիպում կազմակերպել առաջին խմբի «Սպարտակի» /Երեւան/ հետ, իսկ հաջորդ շաբաթ ստուգողական խաղ է նշանակված Աշտարակի «Միկայի» հետ՝ Արմավիրում:
– Երեւանում կմարզվենք մինչեւ հունվարի վերջ,- ասում է ակումբի նախագահ Սեւակ Մանուկյանը:- Այնուհետեւ կմեկնենք Ծաղկաձոր: Այնտեղ շեշտը կդնենք ֆուտբոլիստների ֆիզպատրաստականության վրա: Դրանից հետո կվերադառնանք Երեւան: Հավանաբար, փետրվարի վերջին գնանք Արարատ քաղաքի «Այգ» մարզահամալիր՝ հղկելու թիմի խաղային որակները:
– Թիմում փոփոխություններ շա՞տ կան:
– Հիմնական կորիզը՝ նրանք, ովքեր կոլեկտիվին բերեցին բարձրագույն խումբ, պահպանվել է: Սակայն խաղային օղակներն ուժեղացնելու նպատակով ֆուտբոլիստներ ենք հրավիրել հանրապետության տարբեր ակումբներից: Նրանք մոտ մեկ տասնյակ են եւ հիմա փորձաշրջան են անցնում: Վերջնականապես կկողմնորոշվենք մինչեւ մրցաշրջանը մեկնարկելը:
– Իսկ մարզիչները նո՞ւյնն են մնացել:
– Անցած մրցաշրջանից հետո գլխավոր մարզչին օգնելու ենք հրավիրել Սամվել Խաչատրյանին: Նա ավարտել է Մոսկվայի մարզչական բարձրագույն դպրոցը:
– Որքա՞ն է կազմում ֆուտբոլիստների միջին տարիքը եւ թիմում կա՞ն, արդյոք, հեռանկարային տղաներ:
– Միջին տարիքը մոտ 22 է: Խոստումնալից խաղացողներ էլ ունենք: Օրինակ, հարձակվողական ոճի կիսապաշտպան Արտակ Խոխիկյանը: Նա մինչեւ 19 տարեկանների հավաքականի թեկնածու է: Նրա անունը կա հավաքականի ներկայիս ցուցակում: Ուրիշ ֆուտբոլիստներ էլ ունենք:
– Դրսից խաղացողներ չե՞ք հրավիրել:
– Ոչ: Այս փուլում դրա անհրաժեշտությունը չենք տեսնում:
– Հանրապետությունից դուրս հավաքներ չե՞ք նախատեսել:
– Գուցե վատ չէր լինի, սակայն դա ֆինանսական լրացուցիչ ծախս է:
– Ասում եք՝ «Կիլիկիայի» առջեւ լուրջ առաջադրանքներ կան դրված: Հստակեցնել կարո՞ղ եք:
– Չեմպիոնության մասին խոսելը գուցե վաղ է: Բայց մրցանակային տեղերի համար հաստատ պայքարելու ենք: Ճակատամարտ տալու ենք նաեւ գավաթային հանդիպումներում: Կարճ ասած, ուզում ենք հաջորդ տարի հանդես գալ Եվրագավաթներից որեւէ մեկում, թեկուզ՝ Ինտերտոտոյում:
ԱՇՈՏ ՀԱԿՈԲՅԱՆ
