Երեւանցիներին ուրախացնել չի հաջողվում
Երեւանի քաղաքապետարանի մշակույթի, երիտասարդության հարցերի եւ սպորտի վարչության պետ Արման Սահակյանը խոստացել էր («Առավոտ», 9.12.2003), որ ամանորյա միջոցառումներն այս անգամ ավելի շքեղ են լինելու նախորդ տարիների համեմատությամբ, քանի որ «կա քաղաքապետի համապատասխան որոշում-կարգադրությունը՝ 2003-2004թթ. Ամանորը պատշաճ մակարդակով անցկացնելու վերաբերյալ»: Ավելին, պրն Սահակյանը նույնիսկ մի գաղտնիք էր բացել այս առիթով, ասելով, որ հանուն երեւանցիների տոնական տրամադրության, շարունակելու է «աշխատել էնտուզիազմի եւ ընկերական շրջապատի հաշվին»:
27 մետր բարձրությամբ եղեւնին Հանրապետության հրապարակում, իհարկե, զարդարվեց։ Նախագահն էլ հույս հայտնեց, թե այն 2004-ին կճանաչվի ԱՊՀ երկրների լավագույն տոնածառ։ Սակայն, ցավոք, գլխավոր տոնածառի լույսերը վառվեցին հատուկ առիթներով: Օրինակ, նախագահի՝ հրապարակ այցելած ժամանակ, դեկտեմբերի 31-ի գիշերը, հունվարի 6-ին։
Երեւանցիներին այս տարի եւս չհաջողվեց զարմացնել «հրապարակային» միջոցառումներով։ Հանրապետության եւ Շառլ Ազնավուրի անվան հրապարակներում դեկտեմբերի 31-ին եւ հունվարի 1-ի գիշերը մարդիկ սակավաթիվ էին։ Ավելի ճիշտ, տեղ-տեղ խմբվել էին ծխախոտը բերաններին, պայթուցիկներով ու շամպայնի շշերով «զինված» պատանիներ եւ նրանց տարեկից ներկված աղջիկներ։ Չմոռանանք նշել, որ երկու հրապարակներն էլ լեփ-լեցուն էին տարբեր տարիքի, տրամադրության ու ճաշակի Ձմեռ պապ-Ձյունանուշերով, որոնցից յուրաքանչյուրը անցորդներին «էստի համեցեք» էր անում՝ մի քանի հարյուր դրամով իր հետ լուսանկարվելու համար։ Հիշեցնենք, որ քաղաքապետարանի մշակույթի վարչության պետի խոստման համաձայն, հունվարի 1-ին Ձմեռ պապերն ու Ձյունանուշները պետք է շրջեին Երեւանի համայնքներում ու անվճար նվերներ բաժանեին երեխաներին։ Ինձ ու իմ ծանոթներին, համենայնդեպս, բախտ չվիճակվեց «նվիրատու» Ձմեռ պապ-Ձյունանուշի հանդիպել։ Ամանորի գիշերն ու հունվարի 1-ին կարուսելներ էլ էին տեղադրվել Հանրապետության հրապարակում, որոնք, ի հիասթափություն երեխաների, անվճար չէին։ Ենթադրելի է, որ աշխատեցնողներն էլ, բնականաբար, պատահական մարդիկ չէին։
Քաղաքապետարանը խոստացել է ամանորյա միջոցառումները շարունակել մինչեւ հունվարի 12-ը։ Նշվելու է նաեւ հին նոր տարին, այդ առիթով դարձյալ նվերներ են բաժանվելու երեւանցիներին։ Գուցե ա՞յս անգամ նվերները տեսնողներ լինեն։
Գ. ՀԱԿՈԲՅԱՆ
