«ՄԵՆՔ ՏԱՐԲԵՐ ԵՆՔ» Ըստ ԱԺ պատգամավոր, հանրապետական Աշոտ Աղաբաբյանի՝ ինքն Արծրուն Խաչատրյանից տարբերվում է դաստիարակությամբ ու բնավորությամբ: – Դուք եւ Ձեր ազգակցականները Աջափնյակում հետեւողականորեն պարտվում եք Արծրուն Խաչատրյանին: Ինչի՞ հետեւանքն է դա՝ նա ավելի շա՞տ հեղինակություն ունի այս համայնքում, քան Դուք: – Ինչի՞ շնորհիվ պիտի ունենա հեղինակություն: Ուղղակի երեւի նրան պաշտպանում են հեղինակավոր մարդիկ: Իսկ մենք մեր ուժերով ենք մտնում ընտրապայքարի մեջ: Դա է տարբերությունը: Արման Սահակյանը չի՛ պարտվել: 29 տարեկան երիտասարդի համար 14100 ձայն ազնվորեն շահելը ինչպե՞ս կարելի է չհամարել հաղթանակ: Եվ մեր ընտրողների 60-70%-ը մտավորականությունն էր, որը մինչ այդ երեւի չէր էլ մասնակցում ընտրություններին: Աջափնյակում նման բան չի եղել, որ 31 հազար ընտրող մասնակցի քվեարկությանը: Արման Սահակյանի քարոզարշավն այնպես էր կազմակերպված, որ մեր ընտրողները 100%-ով մասնակցեցին ընտրություններին: Եվ ուզում ենք այժմ շնորհակալություն հայտնել այդ 14100 հոգուն: Իսկ թե ինչքան ձայն է շահել Արծրուն Խաչատրյանը՝ այդպես էլ չիմացա: – 14998: – Դե, ասացին, որ այդպես է: Ինձ թվում է, եթե ուզում են 100%-ով հաստատել, որ իրոք այդպես է՝ պիտի բացեն բոլո՛ր ընտրատեղամասերը: Ինձ չեն գոհացնում բացված 4-5 քվեատուփերը: Եթե ինչ-որ տեղ ինչ-որ բան է արվել մեր կամ նրա համար՝ թող բացեն, նայեն: Ընդհանրապես արգելել եմ, որ հանկարծ խախտում արվի ընտրություններում: Եվ ես էլ Գյումրիում ընտրվելիս էլ ոչ մի խախտում չեմ արել: Քանի որ մտածել եմ ոչ միայն հաղթելու, այլ արդա՛ր հաղթելու մասին: Շատերն են փորձում ինձ կապել ինչ-որ ընտրախախտումների հետ: Չկա՛ն նման փաստեր: Կարող են դնել, քննել՝ արդար ենք մասնակցել բոլոր ընտրություններին: – Արծրուն Խաչատրյանին պաշտպանող մարդիկ առավել հեղինակավոր եւ ազդեցի՞կ են, քան ՀՀԿ-ն, որը պաշտպանում էր Արման Սահակյանին: – Չեմ ցանկանում կուսակցությանը խառնել այս հարցերին, թեեւ Արմանը, ես եւ Գալուստ Սահակյանը հանրապետականներ ենք: Արման Սահակյանը մի անգամ ելույթում ասաց, որ սա այն պաշտոնն է, որն ընդհանրապես պետք չէ քաղաքականացնել: Համայնքապետը եթե լավ աշխատի, ճիշտ կազմակերպի ներդրումային ծրագրերը եւ ժողովուրդը գոհ լինի նրանից՝ մարդիկ թաղապետից վերեւ նայելու ցանկություն էլ չեն ունենա: Թե չէ այժմ Աջափնյակում միայն «Շանթ» գործարանը կա եւ այլեւս չկան աշխատատեղեր: Իսկ ո՞վ է մեղավոր, որ չկան: Ընդամենն ընդունված պիտի լինես քո երկրում եւ ժողովրդի համար, որ կարողանաս ներգրավել ներդրողներին: – Պնդում եք, թե միշտ ապահովել եք արդար ընտրություններ: Բայց եթե անգամ մի կողմ թողնենք 1999-ին Աջափնյակում կատարվածը, էլի մեկնաբանության կարոտ կմնան մրցակիցների պնդումները, թե այս անգամ Աջափնյակում բաժանել եք 3-15 հազարական դրամ ընտրակաշառքներ: – Չեն եղել նման բաներ: Նրանք մինչեւ ընտրություններն էին սկսել սեւ PR վարել, հեղինակազրկել, թե 1999-ին սա՜ է եղել, փողե՜ր ենք բաժանել եւ այլն: Ճիշտն ասած, չեմ ուզում անդրադառնալ այդ ամենին, քանի որ ընդհանրապես իրենց նման չեմ ՝ ո՛չ տեսքով, ո՛չ բնավորությամբ, ո՛չ էլ դաստիարակությամբ: Մենք Արծրուն Խաչատրյանի նկատմամբ չենք իրականացրել սեւ PR: Եվ մեզ ներկելով՝ ավելի շատ իրենք ներկվեցին: Նա ժողովրդի առջեւ կանգնում եւ ասում էր, թե մենք կրակել ենք: Ես կրակել եմ միայն սահմանին, Հայրենիքը պաշտպանելիս: Իսկ Երեւանում չեմ կրակել երբե՛ք: Բավականին ծերեր եւ հաշմանդամներ կան Աջափնյակում ապրող, որոնց օգնել ենք բարեգործական կազմակերպության միջոցով՝ ընդամենը դա էինք հիշեցրել եւ ասել, որ բարեգործական այդ կազմակերպությունը պաշտպանում է Արման Սահակյանին: Բայց ընտրությունների ընթացքում դադարեցրել էինք անգամ բարեգործությունը: – Սակայն Ձեր մրցակիցները պնդել էին, որ «Սիմսեր» բարեգործական կազմակերպությունը բաժանել է շաքարավազ, բրինձ, ձեթ եւ խտացրած կաթ: – Դա շատ շուտ է եղել՝ մինչեւ քարոզչությունը: Պարբերաբար իրականացնում ենք նման բարեգործական միջոցառումներ: Անգամ վիրահատության կամ բուժման խնդրանքով են դիմում ինձ: Եվ ես միշտ օգնել ու էլի եմ օգնելու: – Արծրուն Խաչատրյանն էլ է պնդում, որ աջակցել է կանացի վիրահատություններին, երբ արյունահոսող կանայք եկել են իր մոտ: – Նման օգնությունների պարագայում, որ վերաբերում են կանանց՝ կարելի էր չշեշտել, թե հատկապես ինչ ես արել: Սա էլ է դաստիարակության հարց; – Պնդում եք, թե սեւ PR չեք իրականացրել, սակայն հեռուստատեսությամբ ասացիք, թե Աջափնյակում անգամ մայթեզրին է արվել հողահատկացում: – Բայց դա փաստ է: Այդքան շանտաժների դիմաց միայն դա եմ շեշտել, որ գազոնների մեջ է արել հատկացումներ: Նման բան չի կարելի ընդհանրապես՝ գազոնները, կանաչ տարածությունները մարդկանց թթվածնով ապահովելու համար են, բայց այստեղ գազոնների վրա իրականացվել է շինարարություն: – Աշխատատեղերի մասին. Ձեր մրցակիցը պնդում է, որ Շիրակ հանրախանութի մոտ խլել եք կրպակատերերի աշխատատեղերը: – Մենք այնտեղ աշխատատեղեր ենք ստեղծել եվ ոչ մեկին չենք նեղացրել: Մաքրել ենք եղած աղբանոցը եւ կառուցել գեղեցիկ շինություններ: Իսկ Շիրակ հանրախանութի մյուս կողմում պահպանվել է նույն աղբանոցը: – Հետընտրական զարգացումների մասին. կա՞ն փոխադարձ հաշվեհարդարի որոշակի միտումներ: Ասենք, մեր թերթում հրապարակում եղավ, որ Մարտին Հովհաննիսյանի հետապնդումը պայմանավորված է այն իրողությամբ, որ նա ընտրարշավում պաշտպանել էր Արծրուն Խաչատրյանին: – Շատ լավ հարաբերություններ եմ ունեցել Մարտին Հովհաննիսյանի հետ, երբ նա «Երեւան» հիմնադրամում էր: Բայց տարուց ավելի է՝ չեմ տեսել նրան: Եթե Հայաստանում գտնվի մեկը, որ կասի, թե Աշոտ Աղաբաբյանը հաշվեհարդար է տեսել որեւէ մեկի նկատմամբ՝ թող քրեական գործ հարուցեն եւ պատժեն: Հակառակ կողմից էլ չկան հաշվեհարդարի փորձեր: Արծրուն Խաչատրյանը վերջերս ասել էր, թե որոշ հարցերում պատրաստ ենք համատեղ աշխատել: Պատրաստվում եմ Աջափնյակի համար նման մի գործ ձեռնարկել, քանի որ մեր ստացած 14100 քվեները չենք ցանկանում կորցնել: Մշտապես կապ ենք պահպանելու մեր ընտրողների հետ: Սա նշանակում է, որ ներդրումային ծրագրեր են լինելու, բացվելու են աշխատատեղեր: Հարցազրույցը վարեց ԱՆՆԱ ԻՍՐԱՅԵԼՅԱՆԸ
