ՈՎ Է ՍԻՐՈՒՄ ԻՐ ՀԱՅՐԵՆԻՔԸ ԿԳ նախարարության լեզվի պետական տեսչությունը երեկ ավարտեց «Մեր տանը՝ մեր լեզվով» նշանաբանով ստուգումների տասնօրյակը, որ իրականացվեց ցուցանակներում լեզվական խախտումներ ունեցող տնտեսավարող սուբյեկտների շրջանում: Լեզվի տեսչությունը վճռական է շարունակել գործընթացը այնքան ժամանակ, մինչեւ տնտեսավարող սուբյեկտները ոչ միայն հայկական ցուցանակներ կփակցնեն, այլեւ կշտկեն օտարալեզու ցուցանակի չափերն ու տեղը՝ հայատառի կողքին: Կա մի բացթողում եւս: Ապրանքանիշերի եւ գովազդի մասին օրենքներում մոռացված է Լեզվի մասին օրենքի պահանջը: Այսպես՝ կազմակերպությունը կարող է իր օբյեկտը գրանցել Արտոնագրման վարչությունում եւ իր «օբյեկտի» անունը գրանցել որպես ապրանքանիշ: Օրինակ, «Առեկսիմբանկն» իր ցուցանակները մայրաքաղաքի տարբեր շենքերի վրա փակցրել է միայն ռուսերեն եւ անգլերեն տառերով: Եվ ունի իր արդարացումը. անվանումը Արտոնագրման վարչությունում գրանցվել է որպես ապրանքանիշ: Բայց արդյո՞ք բանկը ապրանք է: Այդ նույն տրամաբանությամբ, ապրանք կարող են համարվել այն բոլոր սրճարաններն ու ժամանցի վայրերը, որտեղ փակցված են օտարալեզու ցուցանակները: Երեկ կազմակերպված ստուգայցերից մեկը Ամիրյան 24 հասցեում գտնվող «Էնիգմա» ակումբում էր: Տնօրենը շատ հանգիստ ընդունեց իր սխալը, սակայն հավաստիացրեց, որ նախապես հայատառ ցուցանակ եղել է, բայց կոտրվել է: Նա նաեւ նկատեց, որ տուգանքն ավելի քիչ է, քան հայատառ ցուցանակը վերանորոգելը: Սակայն նշենք, որ տուգանքից հետո սխալը չուղղելու դեպքում քաղաքապետարանը ստիպված կլինի ապամոնտաժել նաեւ օտարալեզու ցուցանակը: ՀԱՍՄԻԿ ԲՈՒԴԱՂՅԱՆ
