Փախստականից՝ պրիմադոննա Երեւանում է Բոլիվիայի ազգային օպերային թատրոնի պրիմադոննա, երգչուհի Կարինե Ստեփանյանը։ Բաքվի հայտնի դեպքերից հետո փախստականի կարգավիճակում հայտնված Կ. Ստեփանյանը հայրենիքում շարունակել է իր նախընտրած մասնագիտությամբ՝ վոկալիստի ուսումը Երեւանի կոնսերվատորիայում, դոցենտ Կարինե Բաղդասարյանի դասարանում։ Վերջինս այսօր հիշում է. «Անկասկած, կանացի հազվադեպ հանդիպող՝ լիրիկո-կոլորատուրային ձայնով օժտված աղջնակը կարողացավ հաղթահարել իր հոգեկան վիճակը, որի համար պահանջվեց ահագին ժամանակահատված»։ 93-ին ավարտելով կոնսերվատորիան, երգչուհին Երեւանի պոլիտեխնիկ ինստիտուտի շրջանավարտ, Բոլիվիայի քաղաքացի Ժոզեի հետ ամուսնանում ու մեկնում է Հայաստանից։ «Պարզվում է, նորաստեղծ ընտանիքի համար արտերկրում էլ կային բավական դժվարություններ։ Ինչպես հայերս ենք ասում՝ սկսեցինք զրոյից»,- պատմում է Կ. Ստեփանյանը։ Տարբեր դռներ թակելուց ու համերգների մասնակցելուց հետո, 1995 թվականին Լա-Պասում՝ Ռուսաստանի դեսպանատանը, կայանում է երգչուհու մենահամերգը, ծրագրում՝ ռուս կոմպոզիտորների ռոմանսներ։ «Ինձ համար ճակատագրական այդ համերգը, թեեւ ծրագրում միայն ռուս կոմպոզիտորների ստեղծագործություններ էին նախատեսված, բացեցի Ա. Դոլուխանյանի մշակմամբ՝ հայկական ժողովրդական «Ծիծեռնակով»,- հիշեց Կ. Ստեփանյանը։ Այդ օրերին նրանով հետաքրքրվողները համոզված էին, թե երգչուհին ուսանել է Իտալիայում։ Կարինեին հրավիրում են Բոլիվիայի օպերային թատրոնից։ Երգչուհին իր կարիերայի սկզբում բեմ է բարձրանում լիրիկո-կոլորատուրային սոպրանոյի համար համաշխարհային օպերային գրականության լավագույն դերերգերով՝ Ջիլդա (Վերդի՝ «Ռիգոլետո»), Վիոլետա (Վերդի՝ «Տրավիատա»), Լաուրետտա (Պուչինի՝ «Ջանի Սկիկկի»), Լաքմե (Դելիբ՝ «Լաքմե»)։ Իսկ երկու զավակների լույս աշխարհ գալուց հետո տեղի է ունենում երգչուհիների կյանքում հազվադեպ հանդիպող երեւույթ, Կ. Ստեփանյանի ձայնածավալը ընդարձակվում է ու տարիներ շարունակ նա բեմ է բարձրանում արդեն կանացի տարբեր ձայների համար գրված դերերգերով (օրինակ՝ Տոսկա՝ գրված դրամատիկ սոպրանոյի, Կարմեն՝ մեցո-սոպրանոյի համար եւ այլն)։ Աշխարհի օպերային թատրոններում երգչուհու խաղընկերներն են աշխարհահռչակ Ռիկարդո Էստրադան, Միքայել Լոկլին, Գաստոն Պաց Ցեգարրան եւ այլք։ Երգչուհին հանդես է գալիս նաեւ տարբեր սիմֆոնիկ նվագախմբերի ընկերակցությամբ, Դավիթ Հենդելի, Խոզե Լանցա Սալացարի եւ այլ ճանաչված դիրիժորների ղեկավարությամբ։ Իսկ, ըստ արտերկրի հեղինակավոր լրատվամիջոցների՝ հայ երգչուհու գլուխգործոցը Աբիգալի դերերգն է Վերդիի «Նաբուկո» օպերայում։ «Հաջորդ տարի կհանդիպենք Երեւանի օպերային թատրոնում։ Սա իմ տարիների երազանքն է»,- զրույցի վերջում ասաց Կարինե Ստեփանյանը՝ հավաստիացնելով, որ մոտ ժամանակներում կսկսվեն բանակցությունները Երեւանի օպերային թատրոնի գեղղեկավար Գեղամ Գրիգորյանի հետ։ Ս. ԴԱՆԻԵԼՅԱՆ
