ՈՉ ՊԱՏԱՀԱԿԱՆ ՈՐՈՇՈՒՄ Հայաստանում արտակարգ իրավիճակների հարուստ տեսականին է թերեւս պատճառը, որ ԱՄՆ կառավարությունը որոշել է ֆինանսական աջակցություն ցուցաբերել ՀՀ-ին՝ հզորացնելու աղետների հակազդման ազգային համակարգը։ Երեկ Արտակարգ իրավիճակների վարչությունում ֆինանսական օգնության հետ կապված հարցերն իրավաբանորեն ձեւակերպում ստացան։ Ծրագրի իրականացնողը ՄԱԿ-ի Զարգացման ծրագրերի հայաստանյան գրասենյակն է։ Արտակարգ իրավիճակների վարչության պետի տեղակալ Արամ Տանանյանի խոսքերով, ԱՄՆ կառավարությունը չէր կարող պատահական որոշում կայացնել. «Մեր երեք տարիների համագործակցության արդյունքն է, որ այսօր այստեղ հավաքվել ենք։ Երեք տարիների ընթացքում ունեցել ենք համատեղ ուսումնավարժանքներ, հանդիպումներ, պարապմունքներ»։ Ա. Տանանյանն ասաց, որ ծրագրի նպատակն է Ազգային փրկարարական ուսումնական վերապատրաստման, հասարակական լրատվության, ինչպես նաեւ ուսուցման խաղարկային կենտրոնների ստեղծման միջոցով բարելավել աղետներին նախապատրաստվածության աստիճանը։ Ազգային փրկարարների նախապատրաստման կենտրոնում նախատեսվում է ուսուցանել տարածաշրջանի փրկարարներին։ Կմասնակցեն այն երկրները, որոնք ունեն փրկարարական հարուստ փորձ եւ ավանդույթներ։ Իսկ նախատեսվող լրատվական կենտրոնը, որը կներառի հեռուստատեսություն, ռադիո եւ մամուլ, Արամ Տանանյանի մեկնաբանությամբ, թույլ կտա ժողովրդին պարբերաբար տեղեկացնել այն աղետների մասին, որ առկա են մեր երկրում։ Կստեղծվի նաեւ խաղարկային կենտրոն, ինչը կնպաստի խաղարկային իրավիճակների նմանակման շնորհիվ փրկարարների համար դասեր անցկացնելուն։ Լ. ԲՈՒԴԱՂՅԱՆ
