«Թյուրընկալումն» էական չէր

«Թյուրընկալումն» էական չէր Նախ նշենք, որ ԵԱՀԿ դիտորդական առաքելության ղեկավար Պիտեր Այքերի հետ երեկ «Առավոտում» հրապարակված հարցազրույցից դուրս էր մնացել թափանցիկ քվեատուփերին վերաբերող հատվածը, որը պատրաստվում էինք հրապարակել ԿԸՀ-ից պարզաբանումներ ստանալուց հետո: Իսկ մեր զրույցի ժամանակ պրն Այքերին խնդրել էինք հերքել կամ հաստատել Ա.Գեղամյանի նախընտրական շտաբի արած՝ «թափանցիկ քվեատուփերի» մասին, հետագայում սկանդալային դարձած հայտարարությունը: Արդյո՞ք ԿԸՀ-ն չի համաձայնել ընդունել այդ առաջարկը: Ի պատասխան պրն Այքերը բառացիորեն հետեւյալն ասաց. «ՀՀ Ընտրական օրենսգրքում դրույթ կա, որտեղ նշված է, որ ԿԸՀ-ն կարող է օգտագործել թափանցիկ քվեատուփեր: Սակայն, կարծում եմ, իրենց պետք է հարցնեք, թե ինչու են որոշել չօգտագործել դրանք»: Մեր լրացուցիչ հարցադրմանը, թե «այդուհանդերձ, նման առաջարկ եղե՞լ է», պրն Այքերը պատասխանեց. «Առաջարկությունը մենք չենք արել: Մենք ընդամենը դիտորդական առաքելություն ենք, սակայն միջազգային հանրության կողմից թափանցիկ քվեատուփեր տրամադրելու առաջարկ եղել էր»: Կարծում ենք, պատասխանը միանշանակ է եւ թյուրըմբռնման մասին խոսք լինել չէր կարող: Բայց ահա երեկ իսկական խառնաշփոթ առաջացավ: ԿԸՀ-ում, թերեւս, ակնկալելով, որ այդ հարցի շուրջ հարցադրումներ կլինեն, պրն Այքերն ինքը հայտարարեց. «Մամուլում ոչ պարզ հայտարարություններ են եղել թափանցիկ քվեատուփերի վերաբերյալ: Նա (ԿԸՀ նախագահ Ա.Սահրադյանը-Ն.Մ.) ինձ այսօր վստահեցրեց, որ ողջունում է թափանցիկ քվեատուփեր տեղադրելու առաջարկը նույնիսկ նախագահական ընտրությունների համար, եթե հնարավոր լինի դա այդքան արագ անել: Պարոն Սահրադյանը կհանդիպի միջազգային համայնքի անդամների հետ եւ կքննարկի, թե նրանք որքանով են պատրաստ քվեատուփեր տրամադրելու»: Ինչ վերաբերում է կոնկրետ այն հանդիպմանը, որին, ինչպես պարզվեց, ԵԱՀԿ երեւանյան գրասենյակի ղեկավարի տեղակալ Էլեն Կոնկեւիչն է մասնակցել, եւ որտեղ հենց վերջինս է նման առաջարկ արել, Պ.Այքերը հայտարարեց. «Ես ինքս այդ հանդիպմանը չեմ մասնակցել, եւ սա հատկապես այն հարցն է, որ մամուլում սխալ էր ներկայացվել: Որպես դիտորդական առաքելություն՝ մենք առաջարկներ չենք անում»: Ահա որտեղից թյուրըմբռնումը: Պարզվում է, պրն Այքերը չի հերքում հիշյալ առաջարկը ԿԸՀ-ի կողմից մերժելու փաստը, այլ պարզաբանում է, որ առաջարկը ոչ թե ինքը, այլ ԵԱՀԿ երեւանյան գրասենյակն է արել: Նրա խոսքերից հասկացվեց, որ Ա.Սահրադյանը միայն երեկ է ողջունել այդ առաջարկը: Եվս մեկ շփոթ, որն առաջացրեց ԿԸՀ նախագահը: Ավելի ուշ նա իր պարզաբանումներում հերքեց, թե ԵԱՀԿ երեւանյան գրասենյակի ղեկավարի տեղակալ Էլեն Կոնկեւիչի ու պրն Այքերի հետ երեկվա հանդիպման ժամանակ խոստացել է այս հարցը քննարկել միջազգային դոնորների հետ. «Դրա մասին խոսք չի եղել»: Միաժամանակ Ա.Սահրադյանի խոսքերով, երեկ Է.Կոնկեւիչի առաջարկությամբ համաձայնություն է ձեռք բերվել եւս մեկ անգամ մի քանի ժամ անց հանդիպել՝ քննարկելու թափանցիկ քվեատուփերի խնդիրը: «Ես մտահոգությունը հայտնեցի նման հայտարարությունների վերաբերյալ եւ ասացի, որ մեր հանդիպման ժամանակ նման խոսակցություն բացարձակ չի եղել»,- ասում էր Ա.Սահրադյանն ու ճիշտ էր ասում, եթե նկատի ունի կոնկրետ Պ.Այքերի հետ իր նախորդ հանդիպումը: Պրն Սահրադյանը հավաստիացնում էր, որ առաջին անգամ իր եւ տիկին Կոնկեւիչի միջեւ է թափանցիկ քվեատուփերի մասին խոսակցություն եղել՝ մոտ 1-2 շաբաթ առաջ. «Եվ ես ասել եմ, որ ողջունում եմ նման առաջարկը, սակայն այսօր մեր բյուջեում նման հնարավորություններ չկան դա ապահովելու համար: Իրենք առաջարկեցին, որ դոնորների հետ իրենք կբանակցեն, բայց մտահոգություն հայտնեցին, որ գուցե չհասցնեն, եւ առաջարկեցին դա անել ԱԺ ընտրությունների համար: Ես դարձյալ ողջունեցի: Տիկին Կոնկեւիչը տեղեկացրեց, որ ԵԱՀԿ-ն փորձում է միջոցներ գտնել ՀՀ բոլոր ընտրական տեղամասերում թափանցիկ տուփեր տեղադրելու համար, եւ, որ դոնոր երկրների հետ բանակցություններ են վարվում: Նրա կարծիքով, տուփերը պետք է պատրաստվեն արտերկրում, ինչը կպահանջի մոտ մեկ ու կես ամիս»: Րոպեներ անց նույն խոսակցությունը պրն Սահրադյանը միանգամայն այլ կերպ պատմեց, որից պարզ դարձավ, որ «գործին խփողը» հենց ԿԸՀ-ն է եղել՝ ի դեմս պրն Սահրադյանի. «Ես ասացի՝ ողջունում եմ այդ առաջարկությունը, սակայն այս ընտրությունների համար մտավախություն ունեմ, որ չեք հասցնի: Ինքն ասեց, որ միգուցե մենք դա անենք ԱԺ-ի՞ համար: Ասացի՝ խնդիր չկա: Ես նույնիսկ ասացի, որ այս ընտրությունների համար էլ մենք պատրաստ ենք: Թյուրիմացություն է եղել, որի վերաբերյալ շահարկումներ անել չի ստացվի, որովհետեւ մեզ համար կարեւոր է, որ ընտրություններն արդար ու թափանցիկ ընթանան»: Վերջում այս ամենին պրն Սահրադյանը դեռ վերապահումներ էլ արեց. «Ես նաեւ նշեցի, որ դա (խոսքը քվեատուփերի վերաբերյալ առաջարկության եւ դա ընդունել-չընդունելու մասին է- Ն.Մ.) կոլեգիալ որոշման հարց է: Ես էլ պետք է ժամանակ ունենամ: ԿԸՀ-ի որոշումը միայն նախագահի որոշում չէ: Եթե եվրոպական կառույցներն այդ խնդիրն իրենք իրենց վրա կվերցնեն, ապա այդ դեպքում մենք դա կընդունենք, եթե, իհարկե, ԿԸՀ-ն որեւէ այլ մոտեցում չի ունենա»: Կարծում ենք, ԿԸՀ-ն հակված է «այլ մոտեցման»: ՆԱԻՐԱ ՄԱՄԻԿՈՆՅԱՆ