«ԵՍ ԿԱՏԱԿԵԼ ԷԻ» Ասում է նախագահի աշխատակազմի ղեկավար Արտաշես Թումանյանը՝ իրեն վարչապետ նշանակելու վերաբերյալ հարցը բաց թողնելու սեփական պատասխանի մասին: -Երեւանի նախկին քաղաքապետ Ալբերտ Բազեյանը հրապարակավ հայտնել է, որ երբ կառավարության նիստերից մեկի ժամանակ Ձեզ հետ զրուցել է Մեղրիի փոխանակման շուրջ լուրերի մասին, հայտարարել եք. «Իսկ ի՞նչ վատ տարբերակ էր, որ: Ամենաշատը Վազգեն Սարգսյանն էր ոգեւորված այդ տարբերակով»: Իրականությանը համապատասխանո՞ւմ են այս պնդումները: – Ճիշտն ասած, չեմ հիշում, որ այդ թեման քննարկած լինենք Ալբերտ Բազեյանի հետ: Բայց եթե խոսքը ղարաբաղյան խնդրի շուրջ բանակցությունների մասին է, կարծում եմ՝ պետությունների ղեկավարները կարող են քննարկել բազմաթիվ տարբերակներ, այսինքն՝ չեմ կարծում, թե որեւէ կողմ պետք է հրաժարվի միջազգայնորեն ընդունված որեւէ հնարավոր տարբերակի քննարկումից: Սեղանի վրա կարող են լինել բազմաթիվ տարբերակներ: Բայց նախագահ Քոչարյանը հրապարակել է այն կարեւոր հիմնադրույթները, որոնք հայկական կողմի համար ընդունելի տարբերակի հիմքում են: Եվ եթե հարցը պետք է ունենա խաղաղ կարգավորում՝ լինելու են փոխադարձ զիջումներ: – Նախագահն ուղղակի մշտապես հերքել է, թե Մեղրիի տարբերակը եղել է բանակցությունների սեղանին, նշել, թե միայն թռուցիկ առաջարկ է եղել, որից ինքն անմիջապես հրաժարվել է: Իսկ Ձեզ հետ զրույցի մասին պրն Բազեյանի պատմածից հետեւում է, որ փոխանակման կամ հաղորդակցությունների տրամադրման այդ տարբերակը լուրջ քննարկման առարկա է եղել, որին երկրի ղեկավարների մի մասն անգամ հավանություն է տվել: – Ղարաբաղի խնդիրը չի կարող բոլորովին չառնչվել հաղորդակցություններին: Մեր քաղաքական ելույթներում, կուսակցությունների նախընտրական ծրագրերում կարող ենք լինել շատ արմատական, անառարկելի դարձնել ինքնորոշման սկզբունքը՝ չհամադրելով այն եւ ոչ մի բանի հետ: Բայց գտնում եմ, որ քաղաքական լուծումներն, ի վերջո, պետք է լինեն փոխզիջումային: Սակայն նշեմ, որ այս հարցում իրավասու չեմ. սա իմ ոլորտը չէ՝ երբեք չեմ մասնակցել բանակցությունների: – Բայց Ձեզ հայտնի են այդ խնդրի վերաբերյալ Վազգեն Սարգսյանի դիրքորոշումնե՞րը: – Արդեն ասացի, թե չեմ հիշում, որ Ալբերտ Բազեյանին ասած լինեմ նման բան: Իհարկե, մարդկային հարաբերությունների առումով ճիշտ կլիներ, որ եթե լուրջ կամ կեսկատակ որեւէ բան եմ ասել՝ Ալբերտ Բազեյանն այդ մասին հայտներ այն ժամանակ, երբ պաշտոնավարում էր: Կարող եմ նաեւ ասել. Վազգեն Սարգսյանի մահից հետո նրան խիստ կողմնորոշումներ են վերագրում՝ մանավանդ ռուսական, բայց կարդացեք նրա գիրքը՝ այնտեղ ասում է, որ ո՛չ ռուսական կողմնորոշում ունի, ո՛չ արեւմտյան: Շատ հավասարակշռված էին նրա դիրքորոշումները: Համենայն դեպս, հրապարակային, հայտնի տեսակետները դրանք են: – Բայց համաձայնեք, որ ուշադրության արժանի են նաեւ Վազգեն Սարգսյանի դիրքորոշումների վերաբերյալ այն հայտարարությունները, որ անում են նրա կողքին գտնվածները, ասենք՝ եղբայրը կամ Ալբերտ Բազեյանը՝ Վազգեն Սարգսյանի մերձավոր զինակիցը: – Դուք էլ համաձայնեք, որ երբ նա չկա արդեն, այս իրադարձություններից հետո կարելի է կասկածել բոլոր հայտարարությունների առնվազն անաչառությանը: Իմին էլ՝ միգուցե: Չարժե շատ շահարկել, թե Վազգեն Սարգսյանն ինչ էր ասում. մանավանդ որ՝ որեւէ կերպ արձանագրված խոսք չկա: Պետք է ուղղակի նայել առաջ: – Եթե դեմ չեք՝ այս զրույցի ընթացքում փորձենք հնարավորինս պարզաբանել Ձեզ առնչվող այլ ասեկոսեներ եւս: – Իսկ ինչո՞ւ պետք է զրուցենք միայն ասեկոսեների մասին: Մեր զրույցի համատեքստը պետք է անպայման սկանդալայի՞ն լինի: Ես առաջարկում եմ, որ խոսենք այն խնդիրների մասին, որոնք կարեւոր են մեր հանրային շահերի համար: – Այնուամենայնիվ, նախ՝ պարզաբանման կարոտ երկու խնդրի մասին: Թեեւ հակակառավարական, հակավարչապետական ցույցի վերածված Համայնքների միության համագումարից հետո բազմաթիվ էին մեկնաբանությունները Ձեր դերակատարության մասին, որոնց մեկնակետն Էջմիածնի այլեւս նախկին քաղաքապետի հետ Ձեր մտերմությունն է, որեւէ անգամ չանդրադարձաք այդ ամենին: – Հիմա էլ չեմ ցանկանում անդրադառնալ: Համայնքների միության համագումարն ինձ հետ որեւէ ձեւով կապելը 100%-անոց բամբասանք է: Զավեշտական են եղել մեկնաբանությունները, իսկ նման անհեթեթ մեկնաբանությունների դեմ, ճիշտն ասած, անուժ եմ եւ չեմ պատասխանում: Գոնե պիտի ճշմարտության մի տարր լիներ: Նույնիսկ դեմ եմ եղել, որ լինի այդ համագումարը, անհեռանկար եմ համարել Համայնքների միության քաղաքականացումը: – Դուք նախապե՞ս գիտեիք, որ նման տրամադրվածություն կա: – Ոչ: Նաեւ նշեմ, որ 0 է իմ մասնակցությունը համայնքապետերի ընտրությանը՝ ոչ մեկին չեմ օգնել: Ինչ վերաբերում է Էջմիածնի քաղաքապետին՝ 3 անգամ ընտրվել է, բայց 1990-ից նրա հետ մտերիմ լինելով՝ երբեք չեմ օգնել: Բացի այդ՝ լինելով նախագահի աշխատակազմի ղեկավար, ես չեմ կարող սուր քննադատության ենթարկել նախագահի նշանակած վարչապետին եւ կառավարությանը: Չեմ կարող նպաստել այդ քննադատությանը՝ ո՛չ բացահայտորեն, ո՛չ էլ միջնորդավորված: – Մի առիթով նշել էիք, թե Ձեզ վարչապետ նշանակելու վերաբերյալ խոսակցությունները ծնվել եւ շրջանառության մեջ են դրվել լրագրողական շրջանակներում: Սակայն թույլ տվեք հիշեցնել, որ հենց Դուք ասուլիսներից մեկում նախընտրեցիք բաց թողնել այդ հնարավորության վերաբերյալ հարցը: – Տրամադրությունս այդ պահին բարձր էր՝ Լինսի հիմնադրամի գրասենյակների աշխատանքներն էի ներկայացնում: Ճիշտն ասած, կատակեցի ուղղակի, երբ ասացի, որ այդ հարցին չեմ պատասխանի: Լրագրողները հմտորեն օգտագործեցին դա: Բայց ես իսկապես կատակել էի: Զրույցը վարեց ԱՆՆԱ ԻՍՐԱՅԵԼՅԱՆԸ Հ. Գ. Իսկ հանրային շահերի առումով կարեւոր խնդիրների շուրջ Արտաշես Թումանյանի հետ զրույցը՝ մեր վաղվա համարում:
