ՄԵԿՆՈՂՆԵՐԸ ՇԱ՜Տ ԵՆ Հանրապետության երկրորդ՝ Գյումրիի օդանավակայանի 6 հազար քառակուսի մետր թռիչքավազքուղին անցյալ տարի հիմնովին նորոգվել է իր իսկ խնայողությունների հաշվին։ Եվ քանի որ ունի բավարար տեխնիկական հնարավորություններ, այսուհետեւ համարվելու է պահեստային օդանավակայան (մինչ այժմ Հարավային Կովկասի տարածաշրջանում այդպիսին համարվում էր Թբիլիսիի օդանավակայանը)։ Ինչպես տեղեկացանք օդանավակայանի տնօրեն Սեյրան Չուխաջյանից, ընթացիկ տարվա հոկտեմբերի 15-ից երեքով կավելանա Գյումրի իրագործվող չվերթերի թիվը։ Ներկայումս գործում են շաբաթական 4 թռիչք՝ Մոսկվա-Գյումրի-Մոսկվա եւ Սոչի-Գյումրի-Սոչի մեկական չվերթերը։ Առաջինը իրագործում է «Չեռնոմորավիա», երկրորդը՝ «Կրուիզ» ավիաընկերությունները։ Նորաբաց չվերթերը շահագործելու է «Չեռնոմորավիան»՝ դեպի Ռոստով, Կրասնոդար եւ Բաթում ուղղություններով։ Ըստ պրն Չուխաջյանի, բոլոր ուղղություններով ավիատոմսերը մոտ 20 դոլարով էժան են «Հայկական ավիաուղիներ» ընկերության համապատասխան չվերթերի արժեքից։ Մոտ 330 աշխատող ունեցող Գյումրիի օդանավակայանը աշխատում է իր հնարավորությունների 30 տոկոսով։ Իրագործվող չվերթերը ապահովում են 90 տոկոս ուղեւորահոսքի ծանրաբեռնվածություն։ Ըստ տնօրենի, ամսական մոտ 3500 ուղեւոր մեկնում է, վերադառնում՝ 3000-ից պակասը։ ԱՐՄԵՆՈՒՀԻ ԲԱՂՄԱՆՅԱՆ Ուղեւորահոսքի հետ առնչություն ունեցողները, այնուամենայնիվ, վկայում են, որ ուղեւորահոսքն ավելացել է երկու ուղղություններով էլ (դեպի Հայաստան եւ հակառակը) եւ ինքնաթիռները միշտ լիքն են։ Նշում են, որ այս առումով սա աննախադեպ տարի էր։
