ԿԵՆՏՐՈՆԻ ՀԱՄԱՅՆՔԱՊԵՏԻ ԴԵՄ ՀԱՐՈՒՑՎՈՒՄ ԵՆ ԱՐՀԵՍՏԱԿԱՆ ԽՈՉԸՆԴՈՏՆԵՐ ՀՀՇ փոխնախագահ, Կենտրոնի համայնքապետ Արարատ Զուրաբյանը փորձում է երրորդ անգամ ընտրվել այս պաշտոնում՝ հաղթահարելով իշխանական համակարգի դիմադրությունը: -Այս պայմաններում, երբ քաղաքական որոշում կա Ձեր վերընտրությունը թույլ չտալու վերաբերյալ, եւ այդ հարցում միասնական են թե՛ նախագահն ու վարչապետը, թե՛ պաշտպանության նախարարը, հավանակա՞ն եք համարում, որ կկարողանաք հաղթել իշխանական համակարգին եւ շարունակել աշխատանքն իբրեւ Կենտրոնի համայնքապետ: – Իհարկե, շատ դժվար է լինելու: Բայց կարծում եմ, որ համակարգը բավականաչափ թույլ վիճակում է, եւ առանձնապես չեմ տեսնում ինչ-որ քայլեր, որ իշխանությունները կարող են անել՝ խոչընդոտելու բնականոն ընտրապայքարը: Առջեւում նախագահական ընտրություններ են, եւ, կարծում եմ, խելամիտ կլինի, որ դրան նախորդող բոլոր ընտրություններն անցկացվեն առավելագույնս արդար, ուստի հնարավոր եմ համարում հաղթելը: Ճիշտն ասած, իշխանությունները բարձրաձայն չեն հայտարարել, որ դեմ են իմ թեկնածությանը: Բայց ողջ պետական համակարգն աշխատում է մեր դեմ: Չնայած չեմ կարծում, թե դա կարող է ունենալ որեւէ էական ազդեցություն: Բոլոր ժամանակներում էլ Կենտրոնում ընդդիմությունը սովորաբար ավելի ուժեղ է եղել, համոզված եմ, որ հիմա էլ է այդպես: Փառք Աստծո, Կենտրոնում մի քիչ այլ կարգի մարդիկ են ապրում, որոնք ունեն որոշակի հայացքներ, գաղափարներ ու նաեւ գիտեն հարգել սեփական «ես»-ը: – Ինչպե՞ս է դրսեւորվում համակարգի թուլությունը. մի՞թե իշխանությունները չեն կարողացել իրականացնել որեւէ բան, որ մտադրվել են: – Չխոսենք ծրագրերի իրագործման մասին. կա մի բան, որի ականատեսն ենք մեր ամենօրյա իրականության մեջ՝ ներկա իշխանությունները չեն ստացել վստահության այն քվեն, որն անհրաժեշտ է հանգիստ խղճով գործելու համար: Իշխանությունը երբեւիցե չէր գնա այնպիսի քայլի, ինչպիսին հեռուստաալիք փակելն է, եթե վստահ լիներ սեփական ուժերին: Համոզված եմ նաեւ, որ իշխանությունները չեն վայելում ժողովրդի գերակշիռ մասի աջակցությունը, որն անհրաժեշտ կլինի գլխավոր ընտրություններում հաղթելու համար: – Եթե այդպես է, այժմ ոչ թե պիտի փորձեն պաշտպանել արդար ընտրությունների գաղափարը, այլ ձգտեն Երեւանի կենտրոնում ձեռք բերել իշխանությունների համար վստահելի համայնքապետ, որը նախագահական եւ խորհրդարանական ընտրություններում ձայներ կապահովի իրենց համար, ինչը Դուք չեք անի թերեւս: – Իշխանություններին ձեռնտու չէ, որ այստեղ լինեն լարված ընտրություններ, քանի որ Կենտրոնի համայնքապետի ընտրության վրա բեւեռված է թե՛ քաղաքական ուժերի, թե՛ դիտորդների մեծ ուշադրությունը: Եվ իշխանությունները որոշակիորեն չպիտի շահագրգռված լինեն, որ երեւա, թե ընտրություններն արդար չեն անցնում: Իշխանությունների համար կա նաեւ պարտվելու վտանգ: Եթե շատ ակտիվ գործունեություն ծավալեն ու պարտվեն՝ կստացվի, որ տվյալ պարագայում պարտվել է ոչ թե մրցակիցս, այլ իշխանությունը: Կարծում եմ՝ ակտիվ քայլեր անելուց առաջ իշխանությունները մի քիչ կմտածեն: – Նշեցիք, թե երբեք չի ասվել, որ գործող համակարգը դեմ է Ձեր վերընտրությանը: Սակայն մեզ հայտնի է, որ գոնե վարչապետն ուղղակի է ասել, թե կայացվել է քաղաքական որոշում: Համայնքապետի պաշտոնում Ձեր գործունեության վերաբերյալ կառավարության ղեկավարը երբեւէ որեւէ վերապահում կամ դժգոհություն արտահայտե՞լ է, թե՞ խնդիրը միայն Ձեր կուսակցական պատկանելությունն է; – Ճշտեմ. չի ասվել բարձրաձայն, հրապարակայնորեն: Սակայն ասվել է բավականին ուղիղ՝ նույն վարչապետի կողմից: Ես դա համարում եմ բնական: Չնայած կարծում եմ, որ պետական պաշտոնյան, այն էլ՝ այդ մակարդակի, կարող էր ունենալ մի քիչ այլ որակի մոտեցում: Իրենց գործն է: Երբեւիցե չի եղել դժգոհության ոչ մի հարց: Ընդհակառակը՝ ես ունեմ դժգոհություն այն քաղաքականությունից, որը վարվում է Կենտրոն համայնքի նկատմամբ: Ասենք, օրերս դատարան ենք դիմել՝ պետական եկամուտների նախարարության դեմ հայցով, քանի որ գույքահարկի եւ հողի հարկի գումարները՝ շուրջ 200 մլն դրամ, որ պետք է մուտքագրվեին համայնքային բյուջե, փաստորեն գնացել են պետբյուջե՝ ինչ-որ այլ հաշիվների վրա, որոնց գոյությունն անգամ որոշակիորեն կասկածելի է: Ես ամիսներ շարունակ դիմում էի քաղաքապետարան, կառավարություն, ֆինանսների եւ էկոնոմիկայի, պետական եկամուտների նախարարներին, փորձում գտնել լուծումներ, վերադարձնել այդ գումարները, բայց դա ինձ չի հաջողվել: Լրավճարների վերաբերյալ էլ տարբեր են մոտեցումները: Ուղիղ հրահանգ կա մինչեւ ընտրությունները Կենտրոն համայնքին գումարներ չտրամադրելու վերաբերյալ, եւ դրա հետեւանքով ստեղծվել է մի իրավիճակ, երբ չի վճարվել կրթամշակութային համակարգի վերջին ամիսների աշխատավարձը: – Համայնքների միության համագումարում հնչել են նման դժգոհություններ, որ կառավարության համար անցանկալի համայնքապետերի դեմ կիրառվում է այդ մեթոդը. չեն տրամադրվում պետական լրավճարները՝ ընտրողների դժգոհությունը հարուցելու համար: Սա կիրառվել է նաեւ Ձե՞ր նկատմամբ: – Այն բոլոր մեթոդները, որ գործադրվում են որոշ համայնքների դեմ, ամենասուր տարբերակով են կիրառվել Կենտրոնում: Չեմ բողոքում, հաղթահարելի է: Բայց փաստորեն, արհեստական խոչընդոտներ են ստեղծվում մեր գործունեության համար: Ինչեւէ, կարծում եմ, կգա ժամանակ, երբ կունենանք կառավարություն, որը չի դիմի նման քայլերի: – ՀՀԿ-ի պաշտպանյալ թեկնածուն մինչեւ իսկ նախընտրական քարոզարշավի սկիզբն էր ակտիվորեն գովազդվում Հանրային եւ այլ հեռուստաալիքներով՝ ցուցադրվում էին նրա այցերը դպրոցներ, ծննդատներ եւ այլուր: Ընտրարշավում օգտվո՞ւմ եք հավասար հնարավորություններից: – «Ընտրական օրենսգրքի» որոշակի խախտումների տարրեր իրոք կան, բայց ընդհանրապես չեմ ցանկանում բողոքել: Կարծում եմ, որ համայնքի գործող ղեկավարին իր ամենօրյա աշխատանքն ընձեռում է ավելի մեծ առավելություն: Եվ մրցակիցներիս համար էլ այս պայքարը լինելու է բավական դժվարին: Երեւի թե թույլ թեկնածուի դեմ նմանատիպ ուժեղ միջոցների չեն դիմում: – Այս ընտրապայքարում ովքե՞ր են Ձեր կողմնակիցները: Եվ եթե փորձեք սթափ գնահատել սեփական հնարավորությունները՝ որքա՞ն է հաղթելու հավանականությունը: – Կողմնակիցներս բազմաթիվ են. մարտավարական նկատառումներից ելնելով՝ չեմ բացահայտի նրանց, քանի որ, կարծում եմ, որոշակի ճնշումներ կսկսվեն եւ կվնասեն ընտրապայքարին: Կան քաղաքական կառույցներ էլ, որ պաշտպանում են ինձ, բայց ճիշտ չի լինի, եթե ես խոսեմ այդ մասին: Թող նրանք անեն համապատասխան հայտարարություններ, թեեւ ընդունելի է նաեւ առանց բացահայտ հայտարարությունների աջակցությունը: Կարծում եմ, որ մենք ունենք այնքան ուժ, որը բավարար է նմանատիպ երկու ընտրություններում հաղթելու համար: Զրույցը վարեց ԱՆՆԱ ԻՍՐԱՅԵԼՅԱՆԸ
