«ԿՈՒՍԱԿՑՈՒԹՅԱՆ» ԱՆԴԱՄԻ ԴԻՄՈՒՄԸ ՀՀ ՆԱԽԱԳԱՀԻՆ Սեփական հողամասիս օգտագործմանը փաստացի խանգարող ապօրինի շարժական երեք կրպակները իմ ֆինանսական միջոցներով ապամոնտաժելու հարցով (1998-ից) շարունակաբար դիմել եմ իրավասու մարմիններին, բայց մինչեւ օրս հարցի լուծում չի տրված։ Նշված հարցով ս.թ. սեպտեմբերի 20-ին դիմել եմ նաեւ ՀՀ նախագահին։ Դիմումը ուղարկված է Երեւանի քաղաքապետարան։ Դիմումին կցված են դրա պահանջը հիմնավորող բոլոր փաստաթղթերը։ Կրպակները փաստացի խանգարում են իմ սեփական հողամասի օգտագործմանը, իսկ Երեւանի քաղաքապետի 31.07.02 գրությամբ հարցի լուծման ձգձգման կապակցությամբ նշված է. «Հարցի լուծմանը Երեւանի քաղաքապետարանը լավագույն դեպքում կարող է անդրադառնալ հիշյալ երեք կրպակների տերերի հետ Կենտրոն թաղապետարանի կողմից կնքված պայմանագրերի ժամկետը լրանալուց հետո (դեկտեմբեր, 2002թ.)»։ Հարկ եմ համարում նշել, որ կնքված պայմանագրերի պատճենները ինձ տալու մասին իմ բազմաթիվ բողոք-դիմումները թողնված են առանց քննարկման։ Կենտրոնի փոխթաղապետի 29. 11.01թ. գրությամբ նշվածով, որ «կրպակները չունեն համապատասխան փաստաթղթեր», հաստատվում է այն փաստը, որ նախկինում կնքված պայմանագրեր չեն եղել։ Համոզված եմ, որ իմ դիմումը Ձեզ չի հասել, այդ պատճառով թերթով դիմում եմ Ձեզ եւ խնդրում Ձեր հանձնարարականը իմ ս.թ. սեպտեմբերի 20-ի դիմումի հարցին լուծում տալու համար։ ԱՆԱՀԻՏ ՍԱՖԱՐՅԱՆ
