Անդրեյ Մովսիսյանին Հայաստանում սպասում են Ուկրաինայի ինտերնետային լրատվամիջոցները, վկայակոչելով Ռուսաստանի աղբյուրները, ուրախությամբ աշխարհին ավետում են, որ «Սատուրն- Ren-TV» ակումբի եւ Հայաստանի ազգային հավաքականի հարձակվող Անդրեյ Մովսիսյանը նամակով դիմել է Հայաստանի ֆուտբոլի ֆեդերացիա եւ տեղեկացրել, որ հրաժարվում է մեր ազգային հավաքականում հանդես գալուց։ Թե որքանով է դա համապատասխանում իրականությանը եւ որն է պատճառը, հետաքրքրվեցինք ՀՖՖ-ում։ Այնտեղ մեզ ասացին, որ իրենք էլ նման բան լսել են եւ հեռախոսով զրուցել Ա. Մովսիսյանի հետ։ Նա, այո, նման մտադրություն ունեցել է, սակայն վերջնական որոշում դեռ չի կայացրել։ Պատճառը եղել է այն, որ «Եվրո-2004»-ի շրջանակներում Ուկրաինայի հետ հանդիպմանը մեր ազգային հավաքականի մեկնարկային կազմում գլխավոր մարզիչ Օսկար Լոպեսն իրեն չի ընդգրկել։ Դա դիպել է ֆուտբոլիստի ինքնասիրությանը։ Սակայն ֆեդերացիայի պատասխանատու անձինք հեռախոսազրույցի ժամանակ Անդրեյին բացատրել են, որ դա հիմնականում պայմանավորված է եղել այն բանով, որ, փաստորեն, մարզիչ Լոպեսի առաջին պաշտոնական խաղն էր ու նա դեռ լավ չէր ճանաչում լեգեոներականներին։ Իսկ վերոնշյալ հանդիպումից հետո արգենտինացի մարզիչն արդեն ավելի լավ է սկսել կողմնորոշվել հավաքականի հիմնական կազմը որոշելու հարցում։ Այդ մասին Լոպեսն ինքն է ասել ու ավելացրել, որ Ա. Մովսիսյանն այդ առումով անհանգստանալու առիթներ չունի։ Դրա վկայությունն է, որ երեկ ՀՖՖ-ն ֆաքսով Անդրեյին հրավիրել է հոկտեմբերի 8-ից կազմակերպվող հավաքականի ուսումնամարզական հավաքին։ Ճիշտ է, ֆուտբոլիստը դեռ վերջնականապես չի կողմնորոշվել, սակայն, ամենայն հավանականությամբ, ետ կկանգնի իր այդ մտադրությունից։ Ա. ՀԱԿՈԲՅԱՆ
