«Պ. Ադամյան» թատրոնը՝ Երեւանում Երկամյա դադարից հետո չորսօրյա հյուրախաղերով Երեւանում էր Թբիլիսիի Պ. Ադամյանի անվան պետական հայկական դրամատիկական թատրոնը։ Սեպտեմբերի 11-14-ը այն «Հ. Պարոնյան» թատերասրահում երեւանյան թատերասերներին ներկայացավ Վ. Սարոյանի «Իմ սիրտը լեռներում է», Հ. Պարոնյանի «Ատամնաբույժն արեւելյան», Գ. Նարեկացու «Մատյան ողբերգության» եւ Ն. Դումբաձեի «Մեղադրական եզրակացություն» ներկայացումներով։ 1858թ. Գեւորգ Չմշկյանի ղեկավարությամբ ծնունդ առած «Պ. Ադամյան» բազմամյա թատրոնի կամարների ներքո գործել են թատերարվեստի այնպիսի մեծություններ, ինչպիսիք են՝ Չմշկյանը, Աբելյանը, Ադամյանը, Սիրանույշը, Փափազյանը, Ալիխանյանը… «Այսօր Թբիլիսիի հայկական թատրոնը չի կարող հզոր լինել, եթե սերտորեն կապված չլինի Հայաստանի մշակույթի հետ,- ասում է թատրոնի գեղղեկավար Արմեն Բայանդուրյանը եւ ավելացնում,- հերթական հրավերը Հայաստանի մշակույթի նախարարության եւ Թատերական գործիչների միության կողմից է եւ մենք, ինչպես եւ ցանկացած մեկ այլ թատրոն, փորձել ենք այս անգամ եւս երեւանյան հանդիսատեսին ներկայանալ մեր լավագույն չորս ներկայացումներով, որոնցից մեկը՝ Գ. Նարեկացու «Մատյան ողբերգությանը»՝ նվիրված քրիստոնեության 1700-ամյակին, պետպատվեր է։ Իսկ Վ. Սարոյանի «Իմ սիրտը լեռներում է»-ն նվիրել ենք Բաբկեն Ներսիսյանի հիշատակին։ Մեր թատրոնի այսօրվա գերխնդիրը ազնիվ դրամատուրգիայի մատուցումն է»։ Բարձր գնահատելով կառավարության, ինչպես նաեւ Վրաստանի հայերի միության եւ այնտեղ գործող Հայաստանի դեսպանատան հոգատար վերաբերմունք-ուշադրությունը, նա ավելացրեց. «Գաղտնիք չէ, որ այսօր ոչ մի թատրոն առանց հովանավորների չի կարող մեկնել հյուրախաղերի եւ մենք եւս բացառություն չենք»։ Մինչ Երեւան ժամանելը, նրանք հյուրախաղային 3 ներկայացմամբ հանդես են եկել նաեւ Վանաձորում։ Անդրադառնալով թատրոնի մերօրյա գործունեությանը, պրն Բայանդուրյանը նշեց, որ թեեւ փոքր-ինչ բարդ է այսօր ապրել եւ աշխատել Թբիլիսիի առաջատար թատրոնների կողքին, ինչպիսին է, օրինակ, Ռուսթավելու թատրոնը, բայցեւայնպես իրենց կողմից արվում է ամեն ինչ, որ դրսում գտնվող հայ թատրոնը չզիջի իր ստեղծագործական մակարդակով, մանավանդ որ, թատրոնը տարեկան պատրաստում է 4-5 նոր ներկայացում, իր խաղացանկում ունենալով 22-23 բեմադրություն։ «Պ. Ադամյան» թատրոնն այսօր գործում է 1936թ. կառուցված շենքում։ Այն ունի 100 աշխատակից, որոնցից 50-ը ստեղծագործող կազմն է։ Անդրադառնալով թատրոնի սերնդափոխությանը, պրն Բայանդուրյանը նշեց. «Ունենք հզոր միջին սերունդ եւ լավ երիտասարդություն, սակայն սերնդափոխությունն այնպես պիտի արվի, որ վնաս չկրի ոչ միջին սերունդը, եւ առավել եւս՝ ոչ ավագ սերունդը»։ Թատրոնում կարգավորված է կադրային հարցը։ «Թատրոնին կից գործում է ստուդիա, որի շրջանավարտներից 16-ը աշխատում են մեզ մոտ,- ասում է պրն Բայանդուրյանը եւ ավելացնում,- մի կարեւոր փաստ եւս. երկու տարի առաջ Թբիլիսիի թատերական ինստիտուտում բացվել է հայալեզու դերասանական կուրս, որտեղ ուսանում են 6 հայ ուսանողներ եւ 2 տարի անց նրանք թարմ շունչ կբերեն մեր թատրոն»։ Նա ուրախությամբ փաստեց նաեւ, որ հայկական թատրոնը, որն այսօր միաժամանակ նաեւ ինքնատիպ մշակույթի կենտրոն է հայերի համար, ծառայում է ոչ միայն հայ հանդիսատեսին, այլ նաեւ օտարազգիներին, քանզի դահլիճում հաճախ հայերի կողքին կարելի է հանդիպել վրացիների, ռուսների, հրեաների, որոնց համար ներկայացումները թարգմանվում են համապատասխան լեզուներով։ Նա մատնանշելով հայ եւ վրաց թատերագետների լեզվական տարբերությունը, տեղեկացրեց, որ Ե. Ղազանչյանի հետ ձեռք բերված համաձայնության արդյունքում այսուհետ տարեկան 3-4 հայ նշանավոր թատերագետներ կմեկնեն Թբիլիսի՝ դիտելու եւ գնահատելու իրենց խաղը։ Բայանդուրյանն անհրաժեշտություն համարեց 2 տարին մեկ անպայման Երեւան գալը, որն, ըստ նրա, «քննության նման մի բան է, որպեսզի կարողանանք ճիշտ գնահատել մեր աշխատանքի արդյունքը»։ Նա ցավով նշեց, որ առայսօր 145-ամյա թատրոնը, ԱՊՀ երկրներից բացի, հյուրախաղերով չի եղել Սփյուռքում, որը, ըստ նրա, շատ կարեւոր օղակ է։ Խոսելով առաջիկա ծրագրերից, տեղեկացանք, որ վերջերս Վրաստանում տեղի ունեցած երկրաշարժից վնասներ կրած «Պ. Ադամյան» թատրոնում օրերս կսկսվեն ամրապնդման աշխատանքները, իսկ թատերախումբը Հայաստանյան հյուրախաղերից հետո, հոկտեմբերին կմեկնի Ջավախք, իսկ մինչ դեկտեմբեր հանդիսատեսին կնվիրեն երկու նոր ներկայացում։ «Պ. Ադամյան» հայկական պետական դրամատիկական թատրոնը ձմեռային արձակուրդներից հետո՝ մարտին, կրկին կվերսկսի իր բնականոն ստեղծագործական աշխատանքը։ ԳԱՅԱՆԵ ԱԼԵՔՍԱՆՅԱՆ
