Քննությունները շարունակվում են Բուհական ընդունելության քննությունները հասնում են կիզակետին։ Արդեն հայտնի են առաջին արդյունքները որոշակի առարկաների գծով, արդեն առարկայական հանձնաժողովները կարծիք են կազմել 2002-ի դիմորդների մասին, դիմորդներն իրենց հերթին՝ հանձնաժողովների մասին են կարծիք ձեւավորում։ Առայժմ խիստ օբյեկտիվ է համարվում անգլերեն լեզվի առարկայական հանձնաժողովը։ Նախորդ օրը զրուցեցինք հանձնաժողովի նախագահ (գրավոր աշխատանքի) Նեւա Կարապետյանի հետ։ Վերջինիս ներկայացմամբ քննությունները շատ հաջող են ընթանում եւ այս տարվա դիմորդը շատ լավ է նախապատրաստված։ Անգլերենի գրավոր քննության առաջին օրը վիճարկման արդյունքում բարձրացվել է մեկ դիմորդի գնահատականը, երկրորդ օրը՝ 5 հոգու։ Հանձնաժողովը ջնջումների համար դիմորդին չի պատժում եւ, հանձնաժողովի նախագահի ներկայացմամբ, եթե մի փոքր հնարավորություն կա, ապա հարցը լուծվում է հօգուտ դիմորդի։ Տիկին Կարապետյանը քննությունների արդյունքներից գոհ է եւ կարծում է, որ դիմորդներն էլ իրենց են լավ զգում եւ կաշկանդված չեն։ Հանձնաժողովի անդամներն առայժմ դրսից եւ ներսից ճնշումներ չեն զգում եւ օժտված են լիակատար ազատությամբ՝ օբյեկտիվ քննություններ անցկացնելու համար։ Անգլերենի քննության ժամանակ արդեն հետաքրքիր միջադեպեր են գրանցվել։ Օրինակ՝ դիմորդներից մեկը դժգոհել է, թե մրսում է։ Հանձնաժողովը անմիջապես որոշում է կայացրել երեխայի տեղը փոխելու մասին, «որպեսզի չմրսի-հիվանդանա եւ չբացակայի մյուս առարկաների քննություններից, չհայտարարի, թե մրսել է անգլերենի քննության ժամանակ»։ Մի դիմորդուհի էլ քննությունից մեկ ժամ անց հայտարարել է, թե սոված է եւ խնդրել է թույլ տան, որ դուրս գա, մայրիկի մոտից ուտելիք վերցնի, կշտանա եւ վերադառնա քննասենյակ։ Դիմորդին, իհարկե, թույլ չեն տվել դուրս գալ, հանձնաժողովը նրան կերակրել է սեփական «պեչենի»-ով։ Թերեւս հետաքրքիր քննություն կարելի է համարել արեւելագիտության ֆակուլտետի իրանագիտության բաժնի պարսկերեն լեզվով քննությունը։ Սրան մասնակցում էր ընդամենը 5 դիմորդ։ Թեպետ քննությունը գրավոր էր եւ տեւողությունը մոտ 4 ժամ, դիմորդները մեկ ժամը չլրացած ավարտել էին քննությունը։ Հանձնաժողովի նախագահ, իրանագիտության ամբիոնի վարիչ, պրոֆեսոր Գառնիկ Ասատրյանը հայտնեց, որ ճիշտ կլիներ պարսկերեն լեզվով քննություն հանձնողներին առավելություն տրվեր, թեպետ այդ բանը չի արվում։ Համալսարանը դիմել է կրթության եւ գիտության նախարարություն, առաջարկելով, որ պարսկերեն լեզվով քննություն հանձնողներին տրվի որոշակի առավելություն, սակայն հարցն առայժմ առկախ է։ Թեպետ հայ-իրանական հարաբերությունները բուռն թափով զարգանում են, բայց պարսկական բաժին դիմորդների քանակը ոչ միայն չի ավելացել, այլեւ պակասել է։ Հայոց լեզու առարկայի քննական հանձնաժողովում հուլիսի 24-ի քննության օրը հետաքրքիր երկու միջադեպ գրանցվեց։ Քննությունները անցկացվում են համալսարանի ֆիզկուլտուրայի ամբիոնի դահլիճում, որի տանիքը տեղ-տեղ բաց է։ Հատկապես վաղ առավոտյան ծիտիկները ճռվողում են ու ծլվլում։ Հանձնաժողովն անընդհատ զարմանում է, որ ծիտիկները, մեղմ ասած՝ չեն կեղտոտում դիմորդների գլխին։ Այդ առիթով հանձնաժողովի նախագահ Սեյրան Գրիգորյանը նույնիսկ կատակեց՝ արդյոք ծիտիկներին «փամպե՞րս» են հագցրել։ Իսկ ավելի լուրջ՝ քննությունների արդյունքներից պրն Գրիգորյանը գոհ է։ Նա եւս այն կարծիքին է, որ այս տարի դիմորդները շատ լավ են նախապատրաստված։ Ի դեպ, դիմորդներից մեկը քննասենյակ մտավ բջջային հեռախոսով եւ այնպիսի անմեղ դեմքով, կարծես չէր հասկացել (իրոք չէր հասկացել) իր կատարածի հումորը։ Հանձնաժողովը խնդրեց բջջայինը թողնել հանձնաժողովի սեղանին. «Դա էլ թող լինի քո նվերը»,- կատակեցին եւ մեկ րոպե անց հեռախոսը փոխանցեցին տղայի ծնողներին։ Քննությունները շարունակվում են եւ մենք, թեպետ արձակուրդում, բայց կշարունակենք հետեւել ընթացքին։ ՄԱՐԳԱՐԻՏ ԵՍԱՅԱՆ
