ԻՍԿ ԿՆՈՋԸ ՕԳՆՈՒԹՅՈՒՆ ԷՐ ՊԵՏՔ Երեւանից Ջավախք ժամանած պատվիրակությունը օրերս մասնակցեց արդեն ավանդական դարձած Տերյանական եւ Դեմիրճյանական օրերին։ Հայկական պատվիրակությանը տեղ-տեղ՝ զուռնա-դհոլով, տեղ-տեղ՝ պաշտոնապես բարի գալուստ մաղթեցին Նինոծմինդայի ղեկավարությունը, Ախալքալաքի շրջանային գործադիր կոմիտեի անդամները, տեղի մտավորականությունը եւ Թբիլիսիից ժամանած պաշտոնատար անձինք։ Այն, որ Ջավախքի բնակչությունը ամեն տեսակ օգնության կարիք ունի՝ տեսանելի էր նույնիսկ անզեն աչքով։ Ապացույցը՝ ջավախքցի մի կնոջ զարմանքն էր, որ տեսնելով հավաքված բազմությանը, շփոթված հարցրեց. «Էս ի՞նչ է, օգնությո՞ւն են տալիս»։ Երեւանյան մշակույթի օրերը Ջավախքում սկսվեցին այցով Մեծ Ալագյազ գյուղի Գ. Դալիբալթայանի անվան միջնակարգ դպրոց, որը, տեղացիների հավաստմամբ, վերանորոգման կարիք ունի։ Ըստ Երեւանի փոխքաղաքապետ Վարդան Վարդապետյանի, Ջավախքի դպրոցների վերանորոգման հարցը բարձրացվել է դեռ անցյալ տարվանից. «Այս տարի, նախորդ տարվա նման, պետք է վերանորոգվի եւս 4 դպրոց»։ Միջոցառման շրջանակներում իրականացվեց այցելություն նաեւ Դ. Դեմիրճյանի անվան միջնակարգ դպրոց, այնուհետեւ ծաղիկներ դրվեցին մեծ գրողի հուշարձանին։ Ի դեպ, այս դպրոցի տնօրենին խիստ անհանգստացնում էր այն փաստը, որ Հայաստանից այլեւս դասագրքեր չեն ստանում։ Պատվիրակության երկօրյա հյուրընկալությունը ամփոփվեց Գանձայում՝ Տերյանի տուն-թանգարան կատարած այցելությամբ եւ ինքնատիպ դաշտահանդեսով։ ԼՈՒՍԻՆԵ ԲՈՒԴԱՂՅԱՆ
