ԱՐՔԱՆԵՐԻ ԸՆՏԱՆԻՔԸ Գագիկ Հովհաննիսյանը հեղինակ է երկու գրքերի («Խաղաղության երկինք», 1986 թ., «Աղետյալ սեր», 1990 թ.), բազմաթիվ հոդվածների, մեկ տասնյակից ավելի դրամատիկական ստեղծագործությունների։ Վերջերս լույս է տեսել նրա «Արքաների ընտանիքը» գիրքը։ Գրքում ներկայացված է չորրորդ դարի երկրորդ կեսին Հայաստանում ստեղծված քաղաքական բարդ կացությունը։ Հայտնվելով Սասանյան Պարսկաստանի եւ Արեւելյան հռոմեական կայսրության շահերի բախման կիզակետում, Հայաստանի երկու արքաները՝ Արշակ Երկրորդն ու Պապը հուսահատական ճիգեր են գործադրում պահպանելու երկրի անկախությունը, տարածքային ամբողջականությունը եւ վերականգնելու նրա երբեմնի հզորությունը։ Սակայն իշխող դասի կենտրոնախույս տրամադրություններն ու պարսկա-հռոմեական պառակտիչ գործողությունները Հայաստանում աղետալի հետեւանքներ են ունենում ոչ միայն Արշակունի երկու արքաների, այլեւ Հայաստանի եւ հայ ժողովրդի համար։ Մերժելով կեղծ հայրենասիրությունն ու բարոյական հաղթանակների անտեղի թմբկահարումը՝ հեղինակը փորձում է հայ եւ օտար աղբյուրների տեղեկությունների համադրման միջոցով ներկայացնել Հայաստանի պետականության կործանման պատմականորեն քիչ թե շատ հավաստի պատճառները։ Գիրքը նվիրված է Հայաստանի անկախության 10-ամյակին։ Սեփ. լր.
