ԵՐԳԸ՝ ՆՈՐ ՄԱՏՈՒՑՄԱՄԲ «Կարեն Դեմիրճյան» կենտրոնում կայացավ երգչուհի Նունե Եսայանի համերգային ակցիան, որի ողջ հասույթը պետք է փոխանցվի ԱՄՆ-ում սեպտեմբերի 11-ին զոհվածների ընտանիքներին։ Ակցիան, ինչպես հայտնի է, կոչվում էր՝ «Հայաստանը՝ Ամերիկային, Նունե Եսայանը՝ Նյու Յորքին»։ Ներկայացման սցենարը չար եւ բարի ուժերի մասին էր, որոնք հավերժ պայքարի մեջ են։ Երեք օր 2000 տեղանոց դահլիճը լեփ-լեցուն էր։ Երգչուհին կատարում էր իր հին երգացանկի եւ մի քանի նոր երգեր։ Դժվար է ասել, թե որքան գումար ի վերջո հավաքվեց այս համերգաշարից, սակայն ակցիան ինքնին մարդասիրական քայլ էր։ Ներկայացմանը հրավիրված էր հանրահայտ «Տոդես» բալետային խմբից անջատված «Պրոֆի շոու» խումբը, Հայաստանից ներկայացմանը մասնակցում էին Սոֆի Դեւոյանի պարային համույթը եւ տարբեր կոլեկտիվներից անհատ պարողներ: Համերգի պրոդյուսերն էր Ռուբեն Ջաղինյանը: Հանդիսատեսը՝ տարված ներկայացումով, մոռացել էր համերգաշարի բուն նպատակը։ Ակցիան, այնուամենայնիվ, իբրեւ թատերականացված ներկայացում, հաջողվեց։ Առաջին անգամ համերգ-ներկայացման տեխնիկական (լուսային եւ ձայնային) որակը, ձեւավորումը եւ թե՛ երգչուհու, թե՛ նվագախմբի եւ թե՛ պարային խմբերի կատարողականությունը միեւնույն հարթության վրա էին։ Մոտ երկու ժամ ընթացող ներկայացումը ոչ միայն չէր հոգնեցնում-ձանձրացնում հանդիսատեսին, այլ ավելին՝ անընդհատ փոփոխվում եւ անակնկալներ էր մատուցում։ Երգչուհու երգացանկը՝ հին հայկական երգերով եւ համերգ- ներկայացման ժամանակակից մատուցումը հրապուրիչ էր եւ երիտասարդ, եւ ավագ սերնդի հանդիսատեսի համար։ Առաջին անգամ հաջողվեց այնպիսի համերգ-ներկայացում ստեղծել, որը կարող է ներկայացնել այլ երկրների բարձրակարգ բեմերում: Նունե Եսայանը այն քիչ հայ երգչուհիներից է, որոնք կարող են այդքան (երկու ժամ՝ երեք օր անընդմեջ) կենդանի կատարել։ Նույն ոգեւորությունը տիրում էր ամբողջ դահլիճում եւ բեմում, որը լի էր երիտասարդ պարային խմբերով, հայկական ավանդույթների թատերականացված դրվագներով, ծաղրածուներով… հայ երգով։ Լ. ՍԱՐԳՍՅԱՆ
