ՀԱՅԵՐԸ ՍԱԴԱՄԻՆ ՆՎԻՐԵՑԻՆ ԵՐԿՐԱԳՈՒՆԴԸ Ապրիլի 28-ը Իրաքի նախագահ Սադամ Հուսեյնի ծննդյան օրն էր։ Այդ տոնակատարությանը, ի շարս աշխարհի շատ երկրների պատվիրակությունների, հրավիրվել էր նաեւ մեր երկրի 3 հոգիանոց պատվիրակությունը՝ Հայաստան-Իրաք բարեկամության խորհրդարանական խմբի ղեկավար Ղուկաս Ուլիխանյանի գլխավորությամբ։ Մեր հարցին, թե ինչ է նվիրել Սադամ Հուսեյնին, պրն Ուլիխանյանը պատասխանեց. «Օբսիդիանից գլոբուս»։ Նրան խնդրեցինք նաեւ պատմել, թե ինչպես է նշվել այդ ծննդյան օրը, ինչ խորտիկներ կային հյուրասիրության ժամանակ, բայց նա առանձնապես հակված չէր մանրամասներ պատմելու. «Բավականին ճոխ նշվեց։ Ճիշտ է, չկային զանգվածային, մեծ միջոցառումներ՝ երաժշտական կամ նման բնույթի, բայց շքեղ էր՝ զուտ զգայական իմաստով։ Ժողովուրդն, ընդհանուր առմամբ, ցույց տվեց իր հավատարմությունը նախագահին։ 1,5-2 ժամ տեւողությամբ շքերթ անցկացվեց՝ եկել էին տարբեր շրջաններից եւ վանկարկում էին իրենց նախագահի անունը»։ Մեր դիտարկմանը, թե տարօրինակ է նման վերաբերմունքն այն պայմաններում, երբ Սադամ Հուսեյնի քաղաքականության հետեւանքով իրաքցի ժողովուրդը թշվառության մեջ է, պրն Ուլիխանյանն այսպես արձագանքեց. «Իհարկե, ծանր պայմաններում են, սակայն պետությունն ապահովում է բնակչության նվազագույն սպառողական զամբյուղը՝ դոտացիաների շնորհիվ»։ Հույսը չկտրելով, թե կլսենք Սադամ Հուսեյնի ծննդյան օրը մատուցված էկզոտիկ խորտիկների մասին, նորից հարց տվեցինք այդ մասին։ «Մեծ ճաշկերույթներ չեղան։ Նորմալ հյուրասիրություն էր։ Այդքա՛նը»,- կարճ կապեց պրն Ուլիխանյանը։ Ա. Ի.
