ՌՈԲԵՐՏ ՔՈՉԱՐՅԱՆԸ՝ ՄԱՄՈՒԼԻ ԹՇՆԱՄԻ Մամուլի ազատության միջազգային օրը սկսվեց Մամուլի ազգային ակումբում կազմակերպված բրիֆինգից։ Լրատվամիջոցները շնորհավորեցին նախ իրենք իրենց տոնի առթիվ եւ ապա տեղեկացրին նախատեսվելիք ակցիաների մասին։ «Մամուլի թշնամի» տիտղոս էր շնորհվել հանրապետության նախագահ Ռոբերտ Քոչարյանին՝ 2001թ. մայիսի 3-ից մինչեւ 2002թ. մայիսի 3-ն ընկած ժամանակաշրջանում 4-րդ իշխանության նկատմամբ իր ունեցած «բարյացակամ» վերաբերմունքի համար։ Անշուշտ, «Մամուլի թշնամի» տիտղոսի հավակնորդների շարքում եղել էին այլ անուններ եւս, պարզապես վարկանիշային միավորները չէին հերիքել։ Թեկնածուների մեջ էին արդարադատության նախարար Դավիթ Հարությունյանը, «ԶԼՄ-ների մասին» տխրահռչակ օրենքի հեղինակներից՝ ԱՆ փոխնախարար Աշոտ Աբովյանը, նախագահի անվտանգության երաշխավոր Ալեքսան Հարությունյանը եւ Հանրային հեռուստատեսության եւ ռադիոյի մրցութային հանձնաժողովի նախագահ Գրիգոր Ամալյանը։
