ԿԻՐԱՌՎԵՑ ՎԱՐՉԱԿԱՆ ՏՈՒԳԱՆՔ Ապրիլի 30-ին կայացավ ՀՀ Արժեթղթերի հանձնաժողովի հերթական նիստը, որը վարում էր հանձնաժողովի նախագահ Էդվարդ Մուրադյանը։ Նիստի ընթացքում հրապարակվեց «Բարեկամություն» ԲԲԸ գործադիր տնօրենին վարչական պատասխանատվության ենթարկելու մասին Արժեթղթերի հանձնաժողովի որոշումը։ Վերջինիս համաձայն, «Բարեկամություն» ԲԲԸ-ի տնօրեն Վ. Հակոբյանը տուգանվում է 500 հազար դրամի չափով։ Միաժամանակ, ընդունված որոշման համաձայն, վերոնշյալ ընկերության գործադիր տնօրենը պարտավոր է արժեթղթերի գրանցման հայտարարագիրը ներկայացնել ՀՀ Արժեթղթերի հանձնաժողով կամ Հայաստանի ֆոնդային բորսա։ Խնդիրն այն է, որ «Արժեթղթերի շուկայի կարգավորման մասին» ՀՀ օրենքի համաձայն, 50-ից ավելի բաժնետեր ունեցող եւ զուտ ակտիվները 50 միլիոն դրամը (հետագայում նաեւ՝ 25 մլն դրամը) գերազանցող բաց բաժնետիրական ընկերությունները պարտավոր են իրենց արժեթղթերի հայտարարագիրը գրանցել ՀՀ Արժեթղթերի հանձնաժողովում կամ Հայաստանի ֆոնդային բորսայում։ Սակայն «Բարեկամություն» ԲԲԸ-ն ոչ միայն չի կատարել օրենքի պահանջները, այլ նույնիսկ չի կատարել ՀՀ Արժեթղթերի հանձնաժողովի 15.05.01թ. արձակած կարգադրությունը, որով հանձնաժողովը պահանջել էր 30-օրյա ժամկետում ներկայացնել արժեթղթերի գրանցման հայտարարագիրը։ Ավելին, նշված ժամկետը լրանալուց հետո ընկերության գործադիր տնօրենը չի ձեռնարկել բավարար միջոցներ եւ նույնիսկ անարձագանք է թողել 10.12.02թ. հանձնաժողովի լրացուցիչ նախազգուշացումը՝ արժեթղթերի գրանցման հայտարարագիրը չներկայացնելու դեպքում ընկերության եւ նրա կառավարման մարմիններում ընդգրկված անձանց հնարավոր վարչական պատասխանատվության ենթարկելու մասին։ Արժեթղթերի հանձնաժողովի ԼԾ
