«Մեր քաղաքը մեր տունն է» Շատ սեփականատերերի նման, «Անուր» ՍՊԸ-ն եւս որդեգրել է այս կարգախոսը։ Եվ իր «օջախում», տանտիրոջ իրավունքով, ինչ ուզում՝ անում է։ Իսկ մինչ Մաշտոցի թիվ 20 շենքի բնակիչները 2001թ. սկսած դիմում են տարբեր ատյաններ՝ իրենց շենքի բակում ընթացող ապօրինի շինարարությունը կանխելու խնդրանքով, սեփականատերը նոր խախտումներով 2003-ին նախատեսում է ավարտել այն։ «Առավոտն» իր «Վաճառվել է Մաշտոցի 20 շենքի արեւն ու օդը» եւ «Նույն տեմպերով առաջ է ընթանում» հրապարակումներում արդեն անդրադարձել է ի վնաս բնակիչների կատարվող ապօրինությանը։ Հիշեցնենք, որ նշյալ շենքի բակում կառուցվող 9 հարկանի բնակելիի շինարարությունը գրավել էր ոչ միայն շենքի բակը, այլ նաեւ փակել էր բնակիչների բնական լույսը, բակի կողմից՝ հրշեջ մեքենաների ճանապարհը։ Նշենք նաեւ, որ բնակիչների բազմաթիվ դիմումներին ի պատասխան, ճարտարապետության եւ քաղաքաշինության վարչության պետ Ս. Կոտոլիկյանը պատասխանել էր, որ կառուցապատողին առաջարկվել է հանել Մաշտոցի 20 շենքից 4,2 մ հեռավորությամբ նախատեսված մասնաշենքը եւ նվազեցնել կառուցվող շենքի բակային հատվածի հարկայնությունը 2 հարկով։ Ինչպես նաեւ թողնել անցում (դալան) Բուզանդի փողոցից դեպի Մաշտոցի 20 շենքը։ Բնակիչների հավաստմամբ, պրն Կոտոլիկյանի պատասխանի կետերից մեկով էլ իրենց խոստացել էին Բուզանդի փողոցի 55 տնից մինչեւ նոր կառուցվող շենքը 3 մ տարածությունում ոչինչ չկառուցել։ Օրերս «Առավոտը» կրկին եղավ շինարարության վայրում։ Այն, ինչին ականատես եղանք, փաստում էր, որ պարոն «կառուցապատողը» ոչ միայն քամահրանքով էր մոտեցել վերոնշյալ վարչության կողմից արված «սիրալիր առաջարկությանը», այլեւ կառուցվող շենքին գումարել էր եւս 3 հարկ, դալանը՝ փակել։ Իսկ խոստացված 3 մ ազատ տարածության փոխարեն թողնվել էր 1,5 մ, որտեղ էլ կառուցվել էին պատշգամբներ՝ 1-ին հարկի բնակիչներին լրիվ զրկելով արեւից ու լույսից։ Այդքանով չբավարարվելով՝ շինարարության սեփականատեր Ս. Սուքիասյանը վերջերս հերթական անակնկալն էր մատուցել Մաշտոցի թիվ 20 շենքի բնակիչներին, հայտարարելով, որ նախատեսում է կառուցել նաեւ 4,2 մ տարածության վրա գտնվող մասնաշենքը։ Հույսները կտրած՝ բնակիչներն այս անգամ դիմել էին ՀՀ քաղաքաշինության նախարար Դավիթ Լոքյանին՝ ակնկալելով, որ վերջապես հսկողություն կսահմանվի, ինչպես իրենք են ասում, «չարաբաստիկ» շենքի կառուցման վրա։ Բոլորովին այլ էր տեսարանը Մաշտոցի պողոտայի կողմից, որտեղ պատահական անցորդի աչքը շոյում էր «Անուր» ՍՊԸ-ի կողմից կիսակառույցին փակցված ցուցատախտակը. «Մեր քաղաքը մեր տունն է։ Այստեղ կառուցվում է բնակելի շենք՝ բարձրահարկ եւ հարմարավետ» բովանդակությամբ։ Իսկ բնակիչների հետ զրույցի ընթացքում իմացանք, որ ոմանք, ովքեր բոլորից շատ էին տուժել «բարձրահարկ եւ հարմարավետ» կառույցից, պատրաստվում էին վաճառել սեփական բնակարանները։ Սակայն, ինչպես նշեցին նրանք, դա էլ հարցի լուծում չէր։ Մտավախություն կա, որ արեւից ու լույսից զրկված բնակարաններն իրենց գինը կորցրել են։ ԼՈՒՍԻՆԵ ԲՈՒԴԱՂՅԱՆ
