ԵՐԿՈՒՇԱԲԹԻՆ՝ ԻՋԵՑՎԱԾ ՍԱԿԱԳՆԵՐՈՎ ՀՀ տրանսպորտի եւ կապի նախարար Անդրանիկ Մանուկյանը երեկ մամուլի ասուլիսում տեղեկացրեց, որ ապրիլի 15-ից բա-ժանորդները կօգտվեն տեղական եւ միջքաղաքային հեռահաղորդակցության ծառայությունների օրեր առաջ հայտարարված իջեցված սակագներից։ Միանգամից կանխելով լրագրողների տրամաբանական հարցը եւ փարատելով բոլորի զարմանքը, նախարարը հայտարարեց, որ «ԱրմենՏելն» այդ քայլին գնացել է հանուն նրա, որ «Հայաստանի սոցիալական ծանր վիճակում գտնվող բնակչության հոգսերը թեթեւանան»։ Նա հատկապես հավելեց, որ հարցի լուծման համար կա նաեւ իր ղեկավարած նախարարության լուման։ Ի փոխհատուցումն, դրական լուծում է ստացել «ԱրմենՏելի» խնդրանքը, որով, ըստ նախարարի, «մի փոքր» բարձրացվել է ԱՊՀ երկրների գործող հեռախոսակապի վճարը։ Ի դեպ, համաձայն պայմանավորվածության, նախարարի կարծիքով, «ԱրմենՏելի» «մեծահոգության» արդյունքում այսուհետեւ աղետի գոտում հեռախոսի վերատեղադրման ծառայության համար կկիրառվի 500 դրամ սակագինը։ Մարզերում լարային ռադիոյի սպասարկման ապահովումը երկարացվել է մինչեւ սույն թվի սեպտեմբերը, իսկ մինչ այդ փորձ կարվի հարցին վերջնական լուծում տալ։ Չի բացառվում նաեւ, որ «ԱրմենՏելի» հերթական «մեծահոգության» արդյունքում հունիսի 1-ից աբոնենտային 900 դրամ վարձի փոխարեն գործի 750 դրամ սակագինը։ Այս ամենից հետո պարոն Մանուկյանը հաստատակամորեն պնդեց, որ այս սակագների իջեցումը չի ենթադրում, թե ինքը հրաժարվում է իր այն մտքից, որ ոլորտում մենաշնորհին պետք է փոխարինի ազատ մրցակցությունը, իհարկե՝ «դա պետք է լինի օրենքի սահմաններում»։ «ԱրմենՏելի» գործադիր տնօրենի տեղակալ Գ. Վասիլյակիսն էլ իր հերթին պիոներական կեցվածքով ազնիվ խոսք տվեց, որ «ԱրմենՏելը» կանի «բոլոր անհրաժեշտ ներդրումները, որ Հայաստանում կապի որակը լավանա»։ ՆԵԼԼԻ ԳՐԻԳՈՐՅԱՆ
