ՀԱՆՁՆԱԺՈՂՈՎԸ ՊԱՅՄԱՆՆԵ՞Ր Է ԴՐԵԼ Զարմանքով կարդացինք «Առավոտ» թերթի 2002թ. մարտի 19-ին տպագրված «Ա1+»-ի հաճախականության վրա հավակնորդներ կան» ապատեղեկատվական նյութը։ Չգիտենք, մյուս հեռուստաընկերություններն ինչպես, բայց 21-րդ հաճախականությամբ հեռարձակվող «Հայրենիք» հեռուստաընկերությունը եթեր է դուրս գալիս Հեռուստատեսության եւ ռադիոյի ազգային հանձնաժողովի մրցութային պայմանների համաձայն, ըստ որի 21-րդ կապուղին շահած հեռուստաընկերությունը պարտավոր է պահպանել նախ եւ առաջ մեկ պայման (անկախ նրանից, կլինի դա «Հայրենիք» հեռուստաընկերությունը, թե «Առավոտ» թերթը), լինել բացառապես մանկապատանեկան հեռուստաալիք։ «Հայրենիք» հեռուստաընկերությունը լինելով տարածաշրջանի միակ մանկական հեռուստաալիքը, հայտ է ներկայացրել 21-րդ կապուղու համար։ «Առավոտ» թերթի «սեփական լրատուին» կամ գլխավոր խմբագրին խորհուրդ կտայինք փորձել տեր դառնալ 21-րդ կապուղուն եւ զուտ մանկական հաղորդումներ հեռարձակել։ Վ. ՕՀԱՆՅԱՆ «Հայրենիք» Հ/Ը գործադիր տնօրեն Մնում է պարզել. ա) Հեռուստատեսության եւ ռադիոյի մասին օրենքի ո՞ր կետի համաձայն է Հեռուստատեսության եւ ռադիոյի ազգային հանձնաժողովը նման պայմաններ դնում, բ) արդյոք խորհրդարանական եւ նախագահական ընտրարշավի ժամանակ «Հայրենիքը» կմնա՞ բացառապես մանկական հեռուստաալիք։
