ԲԱՆԳԼԱԴԵՇ, ՊՐՈՍՊԵԿՏ, ՇՐՋԱՆԱՅԻՆ, ՌԱՅԿՈՄ Գաղտնիք չէ, որ մեր համաքաղաքացիներից շատերը Հարավ-արեւմտյան թաղամասին քամահրանքով «Բանգլադեշ» են անվանում։ Ո՞վ կարող է ածական անունից խույս տալ։ Բայց այլ բան է, երբ ծաղրանքն ի տես բոլորի գրեթե պարտադրում են, դարձնում պիտակ, գրավոր փաստ, ազդարարելով, որ սա Բանգլադեշն է։ Այսօր Հարավ-արեւմտյան թաղամասից դեպի քաղաքի կենտրոն երթեւեկող երթուղային տաքսիներից քչերի վրա կարելի է կարդալ թաղամասի իսկական անվանումը։ Բարձրաստիճան չինովնիկների վարագուրված մեքենաներից էլ, երեւի, դժվար է նկատել նման «մանրուքը»։ Այլապես ինչո՞ւ քաղաքապետարանի տրանսպորտի կամ պատասխանատու այլ բաժինը չի ստիպում երթուղայինների վարորդներին իրերն անվանելու իրենց անունով, թե՞ նրանք էլ կարծում են, որ ժողովրդի համար ավելի ընդունելի է գավառականը, գռեհիկը, ռաբիսը։ Այսօր շատերը չգիտեն անգամ մի շարք տեղանունների ու փողոցների անունների պաշտոնական տարբերակները, այդ թվում նաեւ վարորդները, որոնք իրենց փոխադրամիջոցների ճակատին անարգել գրում են Բանգլադեշ, պրոսպեկտ, ԳՈՒՄ եւ «բարեհունչ» ու օտարածին այլ անուններ։ ՀՈՎՀԱՆՆԵՍ ՊԱՊՅԱՆ Քաղաքապետարանի տրանսպորտի վարչության պետ Արեգ Բարսեղյանից ճշտեցինք, որ վերոնշյալ հարցում առայժմ միասնական կարգ չկա, բայց առաջիկա մրցույթին, որ մարտին է կայանալու, երթուղային տաքսիների ցուցանակների միասնական ձեւ կպարտադրվի։ Բովանդակային մասը կհաստատի վարչությունը՝ խույս տալու համար ոչ պաշտոնական տեղանուններից, իսկ վահանակը կպատվիրեն իրենք՝ վարորդները։
