Ո՞ՐՆ Է ԵԼՔԸ Կառուցվածքային փոփոխություններից հետո Դիլիջանի «Իմպուլս» գործարանում առանձնացման եղանակով ստեղծվեցին երեք՝ «Դիլիջանի արտադրական ջրերի մաքրման կայան», «Դիլիջանի առողջարանային համալիր» եւ «Իմպուլս» ԲԲ ընկերությունները։ Վերջինը «Իմպուլս» ՓԲԸ-ի իրավահաջորդն է, իսկ առաջին երկու ընկերությունները գործարանի նկատմամբ որեւէ պարտավորություն չունեն։ Հիշյալ ընկերություններից եւ ոչ մեկը ներկայումս չի աշխատում։ Թերեւս «Իմպուլսի» տնօրինությունը քայլեր է կատարում արտադրական նոր ծրագրերի կազմման եւ իրագործման ուղղությամբ, ինչին խանգարում է ձեռնարկության ֆինանսական ծանր իրավիճակը։ Աղետի գոտու վերականգնման ծրագրի շրջանակներում «Իմպուլսի» վերցրած վարկը տրամադրվել է 13 հազար քմ արտադրական մակերեսի կառուցմանը։ Ներկայումս այդ տարածքում շահագործման նպատակով տեղադրվել են հաստոցներ եւ այլ սարքավորումներ, որոնք անգործության են մատնված։ Ձեռնարկության գլխավոր ինժեներ Ալբերտ Մելքոնյանի հավաստմամբ, գործարանը ներկայում էլ պատրաստ է արտադրանք թողարկելու, ինչին խոչընդոտում է մի կողմից՝ պատվիրատուի պատվերների ծավալների կրճատումը, մյուս կողմից՝ հարկային կոշտ քաղաքականությունը։ Տրված վարկի դիմաց տոկոսադրույքների վճարումն այսօր մեծ հիմնախնդիր է պարապուրդի մատնված գործարանի համար: Գործարան, որն անցյալում 3000 աշխատատեղ էր ապահովում։ Գլխավոր ինժեների կարծիքով, առանց պետական աջակցության հնարավոր չէ դուրս գալ այդ իրավիճակից, չփոխելով հիմնական մասնագիտացումը՝ նոր արտադրություններ կազմակերպել։ ՆԵԼԼԻ ՍԱՀԱԿՅԱՆ
